Բարձրագույն դատական խորհուրդն այսօր շարունակում է քննել Երևան քաղաքի ընդհանուր իրավասության դատարանի դատավոր Զարուհի Նախշքարյանին կարգապահական պատասխանատվության ենթարկելու մասին Արդարադատության նախարարության միջնորդությունը:
Զարուհի Նախշքարյանին կարգապահական պատասխանատվության ենթարկելու միջնորդությունը ներկայացրել է Արդարադատության նախարարությունը: Միջնորդության հիմքը դատավորի հրապարակային խոսքն է, որով նա իր վերաբերմունքն է արտահայտել դատավոր Աննա Փիլոսյանի վերաբերյալ ԲԴԽ-ի կայացրած որոշման առնչությամբ: Ըստ արդարադատության նախարարի՝ նա հրապարակայնորեն կասկածի տակ է առել դատավոր Փիլոսյանի վերաբերյալ ԲԴԽ դատական ակտը։ Նախշքարյանը, մասնավորապես, ԲԴԽ որոշումը վիճահարույց է համարել համաչափության տեսանկյունից և գրել, որ ԲԴԽ անդամները պետք է ապրեն այդ որոշման հետ, հետևաբար կասկածի տակ է դնում դատարանի կողմից կայացրած որոշումը։
Զարուհի Նախշքարյանի պաշտպաններ Սիրանուշ Սահակյանը և Ռուբեն Մելիքյանը ճիգեր են գործադրում դատական ակտի վերաբերյալ Զարուհի Նախշքարյանի գնահատականը ներկայացնել որպես խոսքի կամ կարծիքի ազատություն: Մինչդեռ Արդարադատության նախարարության ներկայացուցիչը պնդում է, որ գործող դատավորի կողմից բարձրագույն դատական ակտի վերաբերյալ հայտնած կարծիքը ազատ խոսք չի կարող լինել: Դա նույնն է, որ որևէ այլ դատավոր իրեն իրավունք վերապահի կասկածի տակ դնել մեկ այլ դատավորի կայացրած վճիռը: Որևէ մեկը ոչ Հայաստանում, ոչ այլ երկրում նման բան չի տեսել: Ու այստեղ էլ հնագույն ՞էլիտար իրավագիտությունը՞ ուզում է խիզախ սխրանք գործել:
Այս առնչությամբ, Հելսինկյան ասոցիացիայի նախագահ, իրավապաշտպան Նինա Կարապետյանցը «Առաջին լրատվական»-ի հետ զրույցում նշեց. «Այն տարբերակով, այն գործիքակազմով, որ իրականացվում է գործընթացը, ավելի լավ է ոչինչ չանել: Այն դրսևորումներով, որով անում են հիմա, անհավանական եմ համարում, որ պատասխանատվության ենթարկեն Նախշքարյանին: Նախշքարյանը չլինի, մեկ այլ մեկը լինի, կարևորը ազգանունը չէ, այլ սկզբունքները: Խնդիրը առանձին մարդկանց մեջ չէ, խնդիրը սկզբունքների մեջ է, համընդհանուր մոտեցումների մեջ է: Ամենակարևոր բանը, որ անում է այս իշխանությունը, ապահովում է ֆոնը՝ հաց և տեսարաններ: Այ դա կարողանում է ապահովել, կեղծ բաներով են հասարակությանը կերակրում, թե իբր դատավորներին են պատասխանատվության ենթարկում: Ես անձամբ որևէ փոփոխություն չեմ ակնկալում»:
Նույն խնդրի առնչությամբ փաստաբան Ալեքսանդր Սիրունյանը «Առաջին լրատվական»-ի հետ զրույցում նշեց. «Նախշքարյանը շատ լավ դատավոր է, բայց թե ինչու է այդքան խոսում, ես չեմ կարողանում հասկանալ։Նրա ինչին է պետք գրել, հայտարարություններ անել։ Եթե հիմքեր կան, թող ենթարկեն պատասխանատվության, բայց նման դատավորների արժե պահել։ Ինքը էն 40 դատավորների մեջ չէ, ինքն իրոք լավ դատավոր է։ Իսկ այն 40-ը նարկոման, ալկոհոլիկ, խաղամոլ, իրենք հասարակության մեջ տեղ չունեն: Բայց Զարուհին դրան մեջ չի մտնում: Ընդ որում, վերջերս, Վճռաբեկ դատարանի դատավոր են նշանակել մեկին, որը խաղամոլ է։ Իշխանությունները իրենք թող նստեն մտածեն՝ ինչ են ուզում. եթե վեթինգ եք ուզում անել, եկեք մեխանիզմ մշակեք, վեթինգ անենք, վատերին հանեք, լավերին բերեք»:
Սիրունյանը նկատեց, որ այս տարիների ընթացքում շատ լավ դատավորների են հանել գործից, այն դեպքում, երբ հարբեցողը, նարկոմանը մնում են. «Արդադարդատությունը այսօր ծուռումուռ է քայլում: Հինգ տարվա մեջ Կարեն Անդեասյանի ասած, էդ 40-ը լրիվ տեղում են, բայց ունենք վաշխառու դատավոր, որը մարզի ամենախոշոր վաշխառուն է, տոկոսով գումար է տալիս ու նա հիմա էլ դատավոր է»,-ընդգծեց փաստաբանը:
Լուսանկարը՝ panorama.am-ի
