ԱԺ «Հայաստան» խմբակցության պատգամավոր, բժիշկ Արմեն Չարչյանը զրկվեց անձեռնմխելիությունից։Նրա նկատմամբ քրեական հետապնդում հարուցելուն համաձայնություն տալու մասին ՀՀ գլխավոր դատախազի միջնորդագրին կողմ է քվեարկել մասնակից 68 պատգամավորներից 67-ը։ Ըստ այդ միջնորդության՝ բժշկական օգնություն և սպասարկում իրականացնողների կողմից մասնագիտական պարտականությունները ոչ պատշաճ կատարելու հետևանքով բուժվող հիվանդի մահ առաջացնելու դեպքի առթիվ 2017թ. մարտի 17-ին Քննչական կոմիտեում Քրեական օրենսգրքի 130-րդ հոդվածի 2-րդ մասով (2003թ. ապրիլի 18-ին ընդունված) հարուցվել է քրեական գործ (Բժշկական օգնություն և սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը, որն անզգուշությամբ առաջացրել է բուժվող հիվանդի մահ):Խոսքն Արթուր Սարգսյանի մասին է՝ հանրությանը հայտնի «Հաց բերողի»:Թեմայի շուրջ «Առաջին լրատվական»-ը զրուցել է փաստաբան Տիգրան Եգորյանի հետ:
Վերջինս նշեց, որ բացի Չարչյանից, «Հաց բերող»-ի գործով փորձագիտական եզրակացության մեջ առանցքային դերակատարում ունի նաև նախկին գլխավոր դատախազ Արթուր Դավթյանի սանիկը. «Արթուր Դավթյանի օրոք «Հաց բերող»-ի գործը ձգձգվեց` հասնելով վաղեմության ժամկետի»:
