Սուդանի հարավային Ստորին Կորդոֆան և Երկնագույն Նեղոս նահանգների հազարավոր բնակիչներ փախուստի են դիմում կառավարական զորքերից, որը պատերազմական գործողություններ է սկսել երկրի ապստամբների դեմ:
Ինչպես հայտնում է BBC-ն, ՄԱԿ-ի փախստականների գործերով գործակալության տվյալներով` այս պահին արդեն 16 հազար սուդանցի պատերազմական գործողությունների արդյունքում հատել է Եթովպիայի հետ սահմանը և անցել հարևան երկիր: Իրենց տները լքել են ևս 3 հազար մարդ: Պաշտոնական Խարթումը հայտարարել է, որ կառավարական զորքերի նպատակը ապստամբներին ոչնչացնելն է, քանի որ հակառակ դեպքում Սուդանը հերթական անջատողականության հետ կարող է գործ ունենալ:
Հիշեցնենք, որ այս տարի Սուդանից պաշտոնապես անջատվեցին նրա հարավային քրիստոնեաբնակ նահանգները, որտեղ ստեղծվեց նոր պետություն: