Բրիտանական ոստիկանությունը հինգշաբթի օրը` սեպտեմբերի 1-ին, ձերբակալել է Anonymous և Lulz Security ցանցահենային խմբավորումների հնարավոր ակտիվիստներին: Այս մասին հայտնում է The Guardian-ը: Ոստիկանության տվյալներով` ձերբակալել են Մաքսբորո քաղաքի (Հարավային Յորքշիրի դքսություն) 24-ամյա և Որմինսթերի (Ուլթշերի դքսություն) 20-ամյա բնակիչների: Սքոթլանդ Յարդում մանրամասնել են, որ ձերբակալությունների պատճառը մի քանի խոշոր ցանցային հարձակումներն են որոշ հեռարձակող ընկերությունների կայքերի, ինչպես նաև ԱՄՆ և Մեծ Բրիտանիայի պետական հաստատությունների վրա:
Հայտնվում է, որ որոնումներն անց են կացվել ՀԴԾ-ի հետ համատեղ: Զննության ժամանակ ձերբակալվածներից մեկի տանը գտել են համակարգիչ և ուղարկել փորձաքննության: Ավելի վաղ Մեծ Բրիտանիայում ձերբակալվել էին Anonymous խմբի ևս 4 ներկայացուցիչներ:
Anonymous խմբավորումը իրականացրել է մի շարք լուրջ համացանցային հարձակումներ: 2010 թ. հարձակման են ենթարկվել Visa-ն, Mastercard-ը և Paypal-ը, որոնք արգելափակել են Ջուլիան Ասանժի հաշվեհամարներին փոխանցումները: 2011 թ. հարձակման են ենթարկվել PlayStation Network, Sony Online Entertainment և մի քանի կառավարական կայքեր, ջարդվել է Apple-ի կայքը, և գողացվել են 90 հազար ամերիկյան զինվորականների էլեկտրոնային փոստեր:
