Լիբիայի գծով շփման խմբի Փարիզում մեկնարկած գագաթաժողովի ժամանակ ԱՄՆ պետքարտուղար Հիլարի Քլինթոնը հայտարարել է, որ NATO-ի գործողությունները Լիբիայում անհրաժեշտ է շարունակել, քանի դեռ խաղաղ բնակչությանը վտանգ է սպառնում: Այս մասին հայտնում է BBC-ն: Նրա խոսքերով Քադաֆիին վերջնական տապալելուց հետո Լիբիայի նոր իշխանությունները պետք է զբաղվեն ոչ թե վրեժխնդրությամբ, այլ երկրի վերականգնողական աշխատանքներով:
«Բռնապետական վարչակարգի տապալումը դեռ չի նշանակում, որ մեր աշխատանքն ավարտվել է, իսկ պատերազմի ավարտը դեռ խաղաղության երաշխիք չէ»` հայտարարել է ԱՄՆ պետքարտուղարը` ընդգծելով, որ մոտակա մի քանի օրերը վճռորոշ են լինելու Լիբիայի ապագայի համար:
Միաժամանակ ԱՄՆ-ը Լիբիայի Ազգային անցումային խորհրդին է տրամադրել Լիբիայի նախկին իշխանությունների ավելի քան 700 միլիոն դոլարը, որոնք ավելի վաղ սառեցվել էին: