WikiLeaks-յան վերջին բացահայտումներից մեկն առնչվում է հայ-ռուսական հարաբերությունների հանդեպ Վրաստանի նախագահ Միխեիլ Սաակաշվիլիի մտահոգություններին։ Վրաստանում ԱՄՆ դեսպան Ջոն Բասը «04 TBILISI 000203» ծածկագրով փաստաթուղթը Վաշինգթոն է ուղարկել 2010 թվականի փետրվարի 17-ին։
Փաստաթղթի «Բարդ հարևանություն» հատվածում նշված է. «Վրաստանի ու Ռուսաստանի պաշտոնական հարաբերությունները շարունակում են մնալ բարդ։ Վրաստանը լրջորեն անհանգստացած է Ռուսաստանից դեպի Հայաստան ռազմական սպառազինությունների մատակարման ծավալի մեծացումից։
2010 թվականին պլանավորված օդային մատակարարումներն իրականացվելու են Վրաստանի օդային տարածքով։ Եվ չնայած Թբիլիսին շարունակում է չխոչընդոտել այդ մատակարարումները, որպեսզի չփչացնի իր ջերմ հարաբերությունները Երևանի հետ, այստեղ չեն հավատում, որ հայերը ինքնուրույն կօգտագործեն այդ բոլոր մատակարարումները։
Վրաստանը վախենում է, որ այդպիսի սպառազինությունը, ինչպիսին որ ինքնաթիռների համար նախատեսված խոշոր տրամաչափի զինամթերքն է, նախատեսված են Հայաստանում գտնվող ռուսական զորքերի համար։ Նմանատիպ մատակարարումները կարող են ոչ միայն խախտել Լեռնային Ղարաբաղում տիրող հավասարակշռությունը, այլև գործածվել Վրաստանին հարավից դուրս մղելու համար, եթե ապագայում այնտեղ հակամարտություն առաջանա Ռուսաստանի հետ։
Վրաստանը ձգտում է նաև բարելավել իր հարաբերություններն Իրանի հետ։ Թբիլիսիում համամիտ են Իրանի քաղաքականությանն առնչվող մեր բազմաթիվ մտահոգություններին։ Սակայն միևնույն ժամանակ վրացիները չեն կարող իրենց թույլ տալ հեռանալ այդ հզոր հարևանից ու կարևոր առևտրային գործընկերոջից»։
Հիշեցնենք, որ WikiLeaks-յան վերջին բացահայտումներից մեկում էլ նշված էր, որ 2009 թվականի սեպտեմբերին ԱՄՆ պետքարտուղարի օգնականի տեղակալ Թինա Քեյդենաուի հետ ունեցած հանդիպման ժամանակ Սաակաշվիլին հայտարարել է, որ դրականորեն է մոտենում հայ-թուրքական մերձեցման գործընթացին և հուսով է, որ դա կնպաստի Հայաստանը Ռուսաստանի ազդեցության գոտուց դուրս բերելուն։ Այդ փաստաթուղթը Թբիլիսիում գտնվող ԱՄՆ դեսպանատնից Վաշինգտոն է ուղարկվել 2009 թվականի սեպտեմբերի 25-ին։
