Իսրայելի պաշտպանության նախարարությունը երկու ռազմանավ է ուղարկում իսրայելաեգիպտական սահմանի մոտ: Այս մասին հայտնում է mignews.com կայքը: Նման որոշում Իսրայելի կառավարությունն ընդունել է սպասվող ահաբեկչությունները կանխելու նպատակով:
Իսրայելական հետախուզության տվյալներով Էյլաթում երկու շաբաթ առաջ իրականացված ահաբեկչությունները կարող են կրկնվել, ինչի կապակցությամբ անցած շաբաթ Իսրայելը Սինայի հետ սահմանի վրա ավելացրել էր իր ռազմական ներկայությունը, իսկ Եգիպտոսին թույլատրել էր ապառազմականացված գոտում ավելացնել իր զինված ուժերը` ահաբեկչությունները և սահմանի ապօրինի հատումը ավելի լավ վերահսկելու նպատակով:
Ըստ հրապարակված տեղեկությունների` «Իսլամական ջիհադ» ահաբեկչական կազմակերպությունը մտադիր է հատել եգիպտաիսրայելական սահմանը Սինայում և Իսրայելի հարավային շրջաններում ահաբեկչություններ իրականացնել: Միաժամանակ եգիպտական «Միսր ալ-յաում» թերթը տեղեկացնում է, որ եգիպտական բանակը հակաահաբեկչական գործողություններ է իրականացնում սահմանի ողջ երկայնքով:
