ՀՔԱՎԳ ղեկավար Արթուր Սաքունցը ֆեյսբուքյան իր էջում գրել է. Այո, 2022թ․-ի Հայաստանի քաղաքացիները 44 օրյա պատերազմից դաժան հարված ստացած մարդիկ են, բայց 1920թ․- ի Հայաստանի քաղաքացիները չեն, որոնք ստացել էին 1915թ Ցեղասպանության հակաքաղաքակրթական հարվածը։
Սա ի գիտություն թե ներքին՝ առաջին հերթին, թե արտաքին դերակատարների, իսկ իրականում ամեն կերպ մարդկանց՝ իրենց նկատմամբ, իրենց կարողությունների նկատմամբ անվստահություն սերմացնողների, կամ էլ այդ անվստահությունը սերմացնելու գործողությունները դիտարկողների։
2018թ․ հեղափոխությունը Հայաստանի քաղաքացիների այն հատկության արձանագրումն է, որ ունակ են, կարող են որոշելու թե ինչպես կազմակերպել իրենց կյանքը որպես պետություն։
2018թ թավշյա հեղափոխությունը հայերի որպես քաղաքական ազգ հանդես գալու առաջին փաստարկումն էր, որը թշնաբար ու ատելությամբ ընդունվեց պուտինյան, էրդողանյան ու ալիևյան ռեժիմների կողմից, ու կոռուպցիոն, քրեական մշակույթը կրողների ու այսպես կոչված Հայաստանը որպես սեփական ազգային, տոհմային, կամ էլ կրոնական համայնք, բայց ոչ պետություն դիտարկողների կողմից։
Ներկա իշխանությունն անցած չորս տարիների ընթացքում իր գործողություններով ցույց տվեց, որ այդպես էլ չի գիտակցել 2018թ թավշյա հեղափոխություն իրականացրած քաղաքացիների որպես քաղաքական ազգ հանդես գալու պահանջներն ու ակնկալիքները։
Բայց դա չի նշանակում, թե փոխարինելու հայտ կարող են ներկայացնել 30 տարին մսխածներն ու նրանց՝ Կրեմլի ռազմավարական հպատակներին հայաստանյան քաղաքականություն ուղորդածները։
Չի լինելու ու չի ստացվելու։
