Հայաստանում ԱՄՆ դեսպան Լին Թրեյսին «Ազատությանը» տված հարցազրույցում հայտարարել է, որ Միացյալ Նահանգները պատրաստ է շարունակել աշխատանքը Ռուսաստանի հետ ԵԱՀԿ Մինսկի խմբում՝ հանուն ղարաբաղյան խնդրի համապարփակ ու խաղաղ կարգավորման։ «Հայաստանի և Ադրբեջանի կառավարությունների հետ մեր քննարկումներում հարցերից մի քանիսը վերաբերում են որոշակի տեխնիկական աջակցություն տրամադրելու հնարավորությանը, որոշ տեխնիկական գնահատականներ, որոնք նպատակաուղղված են տարածաշրջանում տրանսպորտային կապերի ապաշրջափակմանը», – ասել է Լին Թրեյսին:
Այս առնչությամբ, Հայ կառուցողական կուսակցության նախագահ Անդրիաս Ղուկասյանը «Առաջին լրատվական»-ի հետ զրույցում նշեց, որ խիստ կարևոր է, որ ԱՄՆ-ն կոմունիկացիաների հարցում ունի իր սեփական առաջարկը:
«Խոսքն այն մասին է, որ Ռուսաստանը պետք է վերադառնա ԱՄՆ-ի և Ֆրանսիայի հետ ձեռք բերված պայմանավորվածությունների շրջանակ: Դա հավանաբար, վերաբերում է և խաղաղարար օպերացիայի իրականացմանը, և Արցախում հանրաքվե անցկացնելու հարցի հետ կապված անցումային շրջանի կարգավորումներին, այն, ինչը եղել է ԵԱՀԿ Մինսկի խմբի համանախագահության օրակարգում, որից Ռուսաստանը շեղվել է նոյեմբերի 9-ին՝ միակողմանի որոշում ընդունելով իր սեփական զորքերն է տեղակայել Արցախում»,-ասաց նա:
Հարցին, թե որքանո՞վ է հավանական, որ Մոսկվան ընդառաջ կգնա և կներգրավվի Մինսկի խմբի համանախագահության շրջանակներում բանակցային գործընթացի մեջ՝ հաշվի առնելով, որ ՌԴ-ն բազմիցս հայտարարել է, որ Մինսկի խմբի եռանախագահությունն այլևս չկա, Անդրիաս Ղուկասյանը պատասխանեց. «Չեմ կարծում, որ Ռուսաստանը կարող է դուրս գալ Մինսկի խմբի կազմից: Ռուսաստանն ընդամենը մի փոքր գրություն պետք է ուղարկի ԵԱՀԿ քարտուղարություն՝ տեղեկացնելով, որ ինքը Մինսկի խմբի կազմից դուրս է գալիս, բայց դա չի անում: Այս պահի դրությամբ մենք տեսնում ենք, որ ոչ Ռուսաստանը, ոչ Թուրքիան, ոչ Ադրբեջանը, որոնք Մինսկի խմբի պլատֆորմը խախտել են 44-օրյա պատերազմի ժամանակ և դրանից հետո ծավալված իրադարձություններով, հիմա չեն կարող իրենց թույլ տալ այդ կառույցի կազմից դուրս գալ: Իսկ դա նշանակում է, որ քաղաքական առումով ԵԱՀԿ հովանու ներքո Արցախի խնդրի համապարփակ կարգավորումը շարունակում է մնալ պարտադիր քաղաքական գործոն բոլոր մասնակից պետությունների համար»:
Ինչ վերաբերում է նրան, որ ԱՄՆ դեսպան Թրեյսին մի քանի անգամ հիշատակել է հայ-թուրքական հարաբերությունների կարգավորումը՝ ընդգծելով, որ այս ուղղությամբ առաջընթացը կարող է նպաստել հայ-ադրբեջանական հարաբերությունների բարելավմանը, քաղաքական գործիչն ասաց. «Իմ կարծիքով, ԱՄՆ-ն, ինչպես 2009-ին, այնպես էլ հիմա ակնկալում է, որ Թուրքիան առանց նախապայմանների կբացի հայ-թուրքական սահմանը: Էրդողանի հայտարարությունը վկայում է, որ Թուրքիայի դիրքորոշման մեջ փոփոխություն չկա: Նա շարունակում է այդ հարցը ստորադասել Հայաստանի և Ադրբեջանի միջև Արցախի հարցի շուրջ հարցին: Իրականում Թուրքիան ակնկալում է, որ Հայաստանը պետք է վավերացնի Կարսի պայմանագիրը, կամ նմանատիպ իրավական ուժ ունեցող մի գործողությամբ հրաժարվի ցեղասպանության հետ կապված որևէ պահանջից Թուրքիայի նկատմամբ: Թուրքիայի գլխավոր դերը այս բոլոր տարիներին եղել է դա»: