Ռուսաստանից Հայաստան դրամական փոխանցումները ակտիվացել են։ Տնտեսագետները դա պայմանավորում են Հայաստան ժամանած ռուսաստանցիների գործարքներով։ Այդ գումարները լրացուցիչ խթան են տնտեսության համար։ Մայիսին արտասահմանից Հայաստան դրամական փոխանցումները 2.3 անգամ աճել են: 2022 թվականի մայիսին ֆիզիկական անձինք բանկերի միջոցով արտասահմանից Հայաստան են ուղարկել 412 մլն դոլար։ Ինչպես վկայում են Կենտրոնական բանկի հրապարակած տվյալները, սա ռեկորդային ցուցանիշ է Հայաստանի համար։ Առնվազն 2004 թվականից, որից սկսվում է տրանսֆերտների վիճակագրությունը, ոչ մի ամիս այդ ծավալի գումար չի փոխանցվել Հայաստան։ Հատկանշական է, որ մինչև մայիս, ռեկորդային էր ապրիլի ցուցանիշը։
Նախորդ տարվա մայիսի համեմատ տրանսֆերտներն աճել են 2.3 անգամ։ Այս աճը պայմանավորված է Ռուսաստանից կատարվող փոխանցումներով։ Այս տարվա մայիսին միայն Ռուսաստանից Հայաստան է փոխանցվել 266 մլն դոլար, որը 3.7 անգամ գերազանցում է նախորդ տարվա մայիսի ցուցանիշը։ Ինչպես ցույց է տալիս տվյալների վերլուծությունը, տրանսֆերտների կտրուկ աճ է նկատվում մարտից։ Ընդհանուր առմամբ, այս տարվա առաջին հինգ ամիսներին արտասահմանից Հայաստան տրանսֆերտները կազմել են 1 մլրդ 272 մլն դոլար, որից 679 մլն դոլարը Ռուսաստանից է, 257 մլն դոլարը՝ ԱՄՆ-ից, 336 մլն դոլարը՝ այլ երկրներից։ 2021 թվականի նույն ժամանակաշրջանի համեմատ ընդհանուր տրանսֆերտներն աճել են 70%-ով։
Այս մասին «Առաջին լրատվական»-ը խոսել է տնտեսագետ Նարեկ Կարապետյանի հետ, որի խոսքով՝ մարտ ամսից սկսած, ինչպես նշեցինք, բավականին մեծ աճ ունենք, հատկապես մայիս ամսին 400 մլն դոլարը գերազանցող համախառն ներհոսք ենք ունեցել, որը մեր պատմության մեջ ռեկորդային ցուցանիշ է: Եթե համեմատենք նախորդ տարվա մայիսի հետ՝ այդ ժամանակաշրջանում ունեցել ենք 200 մլն շրջանառություն, որը հիմա կազմում է կրկնակի ցուցանիշ: Արտահոսքերը ևս աճել են, այստեղից ակնհայտ է դառնում, որ Հայաստանը ֆինանասկան ծառայությունների արտահանողի որոշակի դերակատարում է ստացել, այսիքնքն՝ այստեղ բացվում են մեծ թվով բանկային հաշիվներ, որոնք օգտագործվում են հիմնականում բիզնեսի նպատակներով: Այնուամենայնիվ, մեծ ներհոսքի աճ կա ու, եթե գումարենք վերջին 3 ամիսների ընդհանուր լրացուցիչ ծավալը՝ 2021 թվականի համեմատ 300-350 մլն դոլարով ավել ներհոսք ունենք, սակայն սա իրականում, 3 ամսվա համար, այդքան էլ խոշոր չէ, բայց աճի ցուցանիշներն ակնհայտ են: Ցուցանիշները որոշակիորեն նաև համահունչ են մեր արժույթային շուկայում լրացուցիչ դիտարկվող առաջարկի ծավալների հետ, բայց եթե ֆիզիկական անձանց դրամական փոխանցումների ամենամեծ մասը դիտվել է մայիսին, ապա արժութային շուկայում ավելացումը դիտվել է մարտ-ապրիլին և համեմատած հունիս-հուլիս ամիսների՝ ցածր է: Կարապետյանի նշմամբ՝ որոշակի կանխատեսումներ անել բարդ է, քանի որ մենք հիմա արագ փոփոխությունների գործընթացում ենք և այս պահին լավ ու հստակ փոփոխականներ չունենք, որոնցով կարող ենք կանխատեսել հետագա ամիսների հեռանկարը:
«Փոխանցումներն արդեն դրական ազդեցություն են թողել մեր տնտեսության վրա, մենք արդեն իսկ դա տեսնում ենք: Բանկային համակարգի ավանդները որոշակի աճել են, ոչ քաղաքացիներինը ևս՝ մոտ 200 մլն դոլարով, սա նշանակալից ցուցանիշ է: Բնականաբար, տնտեսություն մտնող փոխանցումները ստեղծում են լրացուցիչ պահանջարկ, լրացուցիչ ներդրումների հնարավորություն, որն ընդհանուր առմամբ ավելացնում են առկա ռեսուրսներն ու դրանց օգտագործումից կախված՝ բերում է համապատասխան տնտեսական արդյունքների: Այնուամենայնիվ, դրական տնտեսական արդյունքներ ակնկալվում են»: