Կինոգետ, մշակութաբան Կիրիլ Ռազլոգովը «Հարություն Խաչատրյան. հավերժ վերադարձ» գրքում ներկայացրել է կինոռեժիսոր Հարություն Խաչատրյանի դիմանկարը՝ եվրոպական, ասիական, ամերիկյան կինոփառատոններում, ինչպես նաև խորհրդային և հետխորհրդային կինոարվեստում ծավալված իրադարձությունների լայն համապատկերում:
Գրքի շնորհանդեսը տեղի ունեցավ «Ոսկե ծիրան» կինոփառատոնի շրջանակում հուլիսի 14-ին Հայաստանի կինոգործիչների միությունում:
Հարություն Խաչատրյանը, որը «Ոսկե ծիրանի» հիմնադիր նախագահն է, ընդգծեց, որ Կիրիլ Ռազլոգովը կինոփառատոնի կարևոր հենարաններից է եղել շուրջ 17 տարի և շատ են ցավում, որ արդեն երկու տարի է՝ իրենց հետ չէ:
«Մենք շնորհակալ ենք նրա կատարած աշխատանքի համար, նրա գրքերի, մեր փառատոնում ունեցած ներդրման համար: Մենք շատ ենք ճամփորդել: Ես մոռանում էի որոշ դրվագներ, իսկ նա գրում էր հիշողությունները, որոնք վերածվեցին գրքի: Այս գիրքը ոչ այնքան ֆիլմերի, որքան մեր մտերմության, մեր ճամփորդությունների մասին է»,-ասաց Խաչատրյանը:
Կինոգետ, սցենարիստ, «Ոսկե ծիրանի» համահիմնադիր Միքայել Ստամբոլցյանը Կիրիլ Ռազլոգովին ճանաչել է 1964 թվականից: Միասին սովորել են, համագործակցել: «Նա կենսուրախ ու շատ նպատակասլաց մարդ էր: Երբ չընդունվեց Կինեմատոգրաֆիայի ինստիտուտ, հետո այնտեղ վերադարձավ որպես դասախոս, երբ նրան չընտրեցին որպես կինոյի ինստիտուտներից մեկի տնօրեն, նա իր սեփական ինստիտուտը բացեց ու գլխավորեց այն: Ռազլոգովը երբեք չէր տրտնջում, չէր բողոքում ու շարունակ աշխատում էր: Դա է պատճառը, որ նրան շատ էինք սիրում ու ցավով փաստում, որ այլևս մեզ հետ չէ»,-ասաց Ստամբոլցյանը:
Կինոգետ Դավիթ Մուրադյանի խոսքով՝ Ռազլոգովը մարդ-մշակույթ էր: Նրա հետ հաղորդակցվելը, զրուցելը, անգամ բանավիճելը հետաքրքիր էր: Փայլուն հումոր ուներ, նվիրված էր ու լավ ընկեր էր»,-շեշտեց նա:
«Հարություն Խաչատրյան. հավերժ վերադարձ» գրքում ի հայտ են բերվում էկրանային արվեստի տեսանելի և խորքային գործընթացները՝ խաղարկային և վավերագրական մտածողության հիմքերի, զանազան մշակութային համայնքների փոխազդեցությամբ: Հենց դրանք են խթանել ռեժիսորի նորանոր ստեղծագործական որոնումները՝ մշտապես վերադարձնելով նրան հայ մշակույթի ակունքներին:
Գիրքը նախատեսված է ուսանողների և կինեմատոգրաֆիական մասնագիտություններ դասավանդողների, ինչպես նաև ընթերցող լայն լսարանի համար:
