Հայաստանը Եվրոպայի խորհրդին իր անդամակցության 21 տարիների ընթացքում կազմակերպության հետ համագործակցության բարձր նվիրում է դրսևորել։ Մամուլի համար հայտարարության ժամանակ այս մասին ասաց Եվրոպայի խորհրդի Գլխավոր քարտուղար Մարիա Պեյչինովիչ Բուրիչին՝ ամփոփելով ՀՀ արտաքին գործերի նախարար Արարատ Միրզոյանի հետ հանդիպման արդյունքները։
«Հայաստանը ստորագրել և վավերացրել է 66 կոնվենցիա և անդամակցել է 12 համաձայնագրի։ Այս տարիների ընթացքում Հայաստանն ակտիվորեն նպաստել է Եվրոպայի իրավական և քաղաքական օրակարգի ձևավորմանը։ Վստահ եմ, որ իր հերթին Եվրոպայի խորհուրդը իր նպաստն է բերել Հայաստանի բարեփոխումների առաջխաղացմանը։ Հուսով եմ, որ այս այցելությունը էլ ավելի կամրապնդի մեր երկխոսության և համագործակցության մակարդակը Հայաստանի և ԵԽ-ի միջև՝ ներկայիս և հաջորդ ծրագրերի լույսի ներքո»,- ասաց Եվրոպայի խորհրդի Գլխավոր քարտուղարը։
Եվրոպայի խորհրդի Գլխավոր քարտուղարը ողջունում է Հայաստանի իշխանությունների պատրաստակամությունը Հայաստանի համար իրականացվող գործողությունների 2019-2022 թթ. ծրագիրը կյանքի կոչելու համար։ Նա նշեց,որ ներկայում մշակում են Հայաստանի համար իրականացվող գործողությունների 2023-2026թթ. ծրագիրը։
«Այս համատեքստում խրախուսում եմ Հայաստանին շարունակել լիովին օգտվել ԵԽ-ի օժանդակությունից և փորձառությունից, օրինակ՝ վերջանական տեսքի բերելու ընտրական գործընթացի բարեփոխումները՝ համապատասխանեցնելով Վենետիկի հանձնաժողովի առաջարկություններին, ԶԼՄ-ների մասին օրենսդրությունը և սահմանադրական բարեփոխումների առաջարկությունները»,- նշեց Մարիա Պեյչինովիչ Բուրիչին:
Ինչ վերաբերում է ԼՂ հակամարտության կարգավորմանը՝ Եվրոպայի խորհրդի Գլխավոր քարտուղարը նշեց, որ ողջունելի են վարչապետ Նիկոլ Փաշինյանի և Ադրբեջանի նախագահ Իլհամ Ալիևի միջև հանդիպումները և դրանց առնչվող հայտարարությունները, ինչպես, օրինակ, սահմանազատման հանձնաժողովի աշխատանքի վերաբերյալ։
«Մենք պետք է վստահության և հաշտեցման հասնենք։ Այդ ուղղությամբ բոլոր նախաձեռնությունները ողջունելի են և պետք է օժանդակություն ստանան»,- եզրափակեց Մարիա Պեյչինովիչ Բուրիչին։
