Մայամիի դատարանը որոշում է կայացրել գանձել Կուբայից 2.8 մլրդ դոլար: Որոշման համար պատճառ է հանդիսացել Գուստավո Վիյոլդոյի հայցը, ով փոխհատուցում էր պահանջել՝ 1959 թ. Ֆիդել Կաստրոյի իշխանության գալուց հետո կրած զրկանքների համար: Այս մասին հաղորդում է Reuters գործակալությունը:
Վիյոլդոն պատմել է, որ Կուբայի հատուկ ծառայությունները մի քանի անգամ փորձել են սպանել իրեն: Բացի այդ, Կուբայի իշխանությունները սպանել են Վիյոլդոյի հորը, որը եղել է հայտնի գործարար: Պաշտոնական վարկածով` նա ինքնասպան է եղել: Սահմանված գումարից 1.4 մլրդ տրվելու է որպես փոխհատուցում Կուբայում կորցրած սեփականության համար: Հայտնի է նաև, որ Վիյոլդոն եղել է ԱՄՆ կենտրոնական հետախուզական վարչության աշխատակից և առնչություն է ունեցել Չե Գևարայի սպանության հետ:
Վիյոլդոյի փաստաբանն ասել է, որ այդ գումարը հնարավոր է ստանալ Կուբայի իշխանությունների սառեցված հաշվեհամարներից կամ Կուբայում իշխանափոխությունից հետո: Սակայն հայտնի է, որ ԱՄՆ-ում սառեցված հաշիվների գումարը կազմում է ընդամենը 200 միլիոն դոլար:
