Գավառի պետական համալսարանում հանդիսավորությամբ բացվեց Արցախյան վերջին պատերազմում հերոսացած ուսանողներին՝ Գուրգեն Այվազյանին, Արմեն Աղեկյանին, Արթուր Վիրաբյանին, Զարզանդ Ներսիսյանին, Էդվարդ Պետրոսյանին, Նվեր Հովսեփյանին, Յուրա Զախարյանին, Ռուբեն Պրազյանին եւ Վահագն Սեյրանյանին նվիրված Փառքի լսարանը:
Արարողությանը մասնակցեցին Գեղարքունիքի մարզպետ Կարեն Սարգսյանը, Գեղարքունյաց թեմի առաջնորդական տեղապահ Տեր Պարթեւ վարդապետ Բարսեղյանը, հոգեւոր դասի ներկայացուցիչներ, Գավառի պետական համալսարանի պրոֆեսորադասախոսական անձնակազմի ներկայացուցիչներ եւ ուսանողներ, հերոսների ծնողներ, զավակներ եւ հարազատներ: Լսարանի բացման պատիվը վերապահվեց Արցախյան 44-օրյա պատերազմի հերոս, Գավառի պետական համալսարանի շրջանավարտ Նվեր Հովսեփյանի երեք զավակներին: Բացման խոսքով հանդես եկավ Գավառի պետական համալսարանի ռեկտոր Ռուզաննա Հակոբյանը: «Փառքի այս լսարանը մի սրբավայր է, որտեղ տեղադրված են Արեւմտյան Հայաստանից ու Արցախից բերված հող եւ բազմապիսի այլ մասունքներ: Այստեղ ստեղծված է Արցախյան վերջին պատերազմում զոհված մեր 10 ուսանողների կամ շրջանավարտների Փառքի անկյունը, որոնցում տեղադրված են նրանց փաստաթղթերը, իրերը, լուսանկարները:Մեր ուսանողները մաքառեցին հանուն հայրենիքի եւ անմահացան այսպես՝ սերունդներին թողնելով պայքարելու եւ արարելու պատգամը»,-նշեց Ռուզաննա Հակոբյանը:
Օրհնության կարգ կատարեց եւ ոգեկոչման խոսքերով հերոսների ծնողներին ու հարազատներին դիմեց Գեղարքունյաց թեմի առաջնորդական տեղապահ Տեր Պարթեւ վարդապետ Բարսեղյանը: «Այսօր մեզ համար մխիթարության եւ հպարտության օր է այն առումով, որ այս լսարանում պիտի կրթվեն ու դաստիարակվեն մատաղ սերունդները: Այս տաս հերոսների ազատասեր ու հայրենասեր ոգին թրծվել է այս հաստատության պատերի ներսում, ինչը փաստում է, որ 25 տարին բոլորած Գավառի պետական համալսարանի ուսանողները ոչ միայն մասնագիտություն են ձեռք բերում այստեղ, այլ նաեւ՝ հայրենասիրական հզոր ոգի»,-ասաց Տեր Պարթեւ վարդապետ Բարսեղյանը:
Ապա` միջոցառման մասնակիցներին դիմեց Գեղարքունիքի մարզպետ Կարեն Սարգսյանը: «Գավառի պետական համալսարանը մեր հերոսների սիրելի ու հարազատ տունն էր, անկրկնելի ընտանիքը, որտեղ նրանք սիրով ու նվիրումով կրթվում ու մասնագիտանում էին, ձեռք բերում կյանքի ու հայրենաշինության համար կարեւոր գիտելիքներ, կայանում որպես երկրի հասուն քաղաքացիներ ու հայրենիքի նվիրյալ պաշտպաններ։ Նրանք պարտքի գերագույն գիտակցումով էլ մեկնել էին զինվորական ծառայության եւ անսասան կանգնած էին հայրենիքի պաշտպանության դիրքերում։ Ու մեր քաջերը դա ապացուցեցին իրենց հերոսական մաքառմամբ, անձնազոհությամբ ու անսասան կամքով։
Գավառի պետական համալսարանի պատմությունը հարստացավ փառքի անջնջելի էջերով, հերոսության այնպիսի դասերով, որոնք միշտ սերտելու են այս հաստատությունում սովորող սերունդները։ Մեր քաջերի անունները, նրանց գործած սխրանքները երբեք չեն մոռացվի ոչ միայն այս պատերի ներսում, այլ մեր ամեն մի քաղաքում ու շենում, մեր հոգիներում, դասագրքերում, ամենուրեք»,- նշեց մարզպետը։
Ոգեկոչման ու խոնարհումի խոսքերով հանդես եկան նաեւ Գավառ համայնքի ղեկավարի տեղակալ Գրիգոր Դաշտոյանը, Գավառի պետական համալսարանի ուսումնական գծով պրոռեկտոր Նելլի Կուտուզյանը, դասախոս Համլետ Ղաջոյանը, զոհված հերոսների ընտանիքների անդամներ:
Անուն առ անուն ներկայացվեցին հերոսների քաղաքացիական ու զինվորական կենսագրությունները, նրանց հիշատակին երգեր եւ բանաստեղծություններ ձոնեցին Գավառի պետական համալսարանի ուսանողները եւ Գավառի արվեստի դպրոցի սաները:
Համալսարանի ռեկտոր Ռուզաննա Հակոբյանը ծնողներին եւ հարազատներին հանձնեց հերոսների տպագրված կենսագրականները՝ դրանք իրենց բնակարաններում բացված Փառքի սենյակներում տեղադրելու համար: Միջոցառման ավարտին Գեղարքունիքի մարզպետ Կարեն Սարգսյանը եւ մյուս մասնակիցները ծաղիկներ դրեցին Փառքի լսարանի հուշանկյունների ցուցափեղկերին: