Ռուսաստանցի միլիարդատեր, անգլիական Chelsea ֆուտբոլային ակումբի սեփականատեր Ռոման Աբրամովիչին պատկանող հայտնի Eclipse զբոսանավը ֆրանսիական նավահանգիստներից մեկում իր մեծ չափերի պատճառով չի կարողացել խարիսխ գցել: Ֆրանսիական Անտիբա ծովափում, որտեղ 2 հազար նավ կարող է կանգ առնել, միայն մեկ տեղ է նախատեսված նման մեծ չափերի նավերի համար, որը, սակայն, արդեն զբաղեցրել էր սաուդցի արքայազն Ալ-Վալիդ բեն Թալալ ալ-Սաուդի 86 մետրանոց խոշոր զբոսանավը: Արդյունքում ռուսաստանցի միլիարդատիրոջ նավը կանգ է առել ծովում, ափից մի քանի հարյուր մետր հեռավորության վրա:
Ռոման Աբրամովիչն ուներ ևս երեք խոշոր նավ` Pelorus` 115 մետր, Ecstasea` 86 մետր և Sussuro` 49 մետր երկարությամբ, սակայն առաջին երկուսը նա վաճառել էր: Թերթը գրում է, որ մի անգամ Ռոման Աբրամովիչը նույնիսկ թույլ է տվել իր ակումբի ֆուտբոլիստներ Ֆրենկ Լեմպարդին և Ջոն Թերրիին զբոսանքի համար վերցնել Pelorus նավը:
Ռոման Աբրամովիչը դեռ 3 տարի առաջ դիմել էր Անտիբա քաղաքի ղեկավարությանը սեփական նավահանգիստ կառուցելու թույլտվություն ստանալու համար, սակայն նրա խնդրանքը մերժել էին` պատճառաբանելով, որ նման բան քաղաքապետարանը չի նախատեսում:
Ինչպես նշում է The Daily Mail-ը, Eclipse-ի երկարությունը 170 մետր է, այն մոտ երկու անգամ ավելի մեծ է սաուդյան արքայազնի զբոսանավից, սակայն Ալ-Վալիդը, Forbes ամսագրի տվյալներով 2 անգամ ավելի հարուստ է Աբրամովիչից:
