Իլհամ Ալիևը «Հարավային Կովկաս. զարգացում և համագործակցություն» միջազգային համաժողովի մասնակիցների հետ հանդիպմանը հայտարարել է, որ, ելնելով Ադրբեջանի առաջարկից, Հայաստանը վերջապես համաձայնել է ստեղծել համատեղ աշխատանքային խմբեր Ադրբեջանի հետ՝ սկսելու հայ-ադրբեջանական սահմանազատման գործընթացը. «Սա կարևոր նշան է, ցուցանիշ, որ հիմա՝ ղարաբաղյան երկրորդ պատերազմից մեկուկես տարի անց, Հայաստանի ղեկավարությունը և, հուսով եմ, բնակչությունը հասկանում են խաղաղության անհրաժեշտությունը։ Եվ եթե խաղաղության պայմանագիր կնքվի, և այդ հիմնարար սկզբունքները հայտնի լինեն, Կովկասում խաղաղությունը կլինի կայուն և երկարատև։ Սա այն է, ինչ մենք ուզում ենք: Այն, ինչ մենք ցույց ենք տալիս և հայտարարում, Կովկասում խաղաղության հաստատման մեր կամքի վառ օրինակն է»,- հավելել է Ալիևը։
«Հայաստանը պետք է հասկանա, որ տարածաշրջանի «կղզային» ռեժիմում մեկուսացված մնալն անհնար է։ Հարաբերություններ հաստատելով Ադրբեջանի հետ՝ միաժամանակ հրաժարվելով Ադրբեջանի և Թուրքիայի նկատմամբ տարածքային պահանջներից. դա չպետք է խանգարի եռակողմ համագործակցության գործընթացին»,- նշել է նախագահը։
