Դալմայի այգիների նախկին սեփականատերերը արդեն 8 տարի է` պայքարում են իրենց սահմանադրական իրավունքները պաշտպանելու համար։ 8 տարի առաջ ամայի վայրը Դալմայի այգիներ դարձրած մշակողներին նույնիսկ տեղյակ չպահելով՝ Երևանի քաղաքապետարանը տեղանքը հանել է աճուրդի և վաճառել։ Նախկին սեփականատերերից շատերը ստացել են փոխհատուցում, իսկ մնացածի՝ մոտ 70 հոգու հարցը (քաղաքապետարանի ներկայացրած ցուցակի համաձայն` լուծված չէ միայն 35 այգետերերի հարցը) չի լուծվել մինչ օրս։
Քաղաքապետարանից հույսը կտրած՝ հողօգտագործողները դիմել են այգիների նոր սեփականատերերին։ «Նոր հողատերերը մեզ ասում են, որ քաղաքապետարանին մի փեշ փող են տվել ու մեզ փոխհատուցում տալու փող չունեն»,- ասում է նախկին սեփականատերերից մեկը։
Արդեն տարիներ շարունակ ամեն երեքշաբթի այս մարդիկ հավաքվում են նախագահական նստավայրի առջև՝ ցուցապաստառներով, փաստաթղթերով զինված։ Այսօր ևս նախագահը նրանց բողոքը չլսեց։
«Քաղաքապետարանում Սերժ Սարգսյանը հայտարարեց, որ գոյություն ունեն մի շարք խնդիրներ, այդ թվում նաև Դալմայի այգիների սեփականատերերի հարցը, որոնց լուծմանը պետք է քաղաքապետարանը հետևողական լինի: Այդ մասին խոստացել է նաև քաղաքապետը, սակայն մեր խնդիրը չի լուծվել, և հույս էլ չկա»,- ասում է «Դալմա-Սոնա» ընկերության նախագահ Ռուզաննա Ղազարյանը։
