«Հզոր ապագա» կուսակցության նախագահ Արկադի Կիրակոսյանն այսօր ներկայացրեց շաբաթ օրը 1.30-ի սահմաններում Պռոշյան փողոցի ռեստորաններից մեկում տեղի ունեցած միջադեպի պատճառները։ Հիշեցնենք, որ միջադեպից հետո նա դիմել էր Արաբկիրի ոստիկանական բաժանմունք, ինչից հետո գործին ընթացք էր տրվել։ Մի շարք թարս ու շիտակ հարցերից հետո, Արկադի Կիրակոսյանը խոստովանեց, որ միջադեպի պատճառը ՕԵԿ-ին միանալ-չմիանալու հարցն է եղել։
Ինչպես նա է պատմում, իր կուսակից ընկեր Վահե Զարոյանի հետ ռեստորանում քննարկել են ՕԵԿ-ի հետ միանալու հարցը։ Այդ մտքի հետ Վահեն համաձայն չի եղել։ Որոշ ժամանակ անց Արկադիի ինքնազգացողությունը վատացել է, նա տաքսի է կանչել՝ տուն գնալու համար, Վահեն իրեն քաշքշել է, որից հետո Արկադին դիմել է ոստիկանություն։
Ինչ վերաբերում է այն նախնական ինֆորմացիային, թե միջադեպին ներկա ոստիկան Արամ Հակոբյանը հայհոյել է երկրի նախագահին և հայհոյանքներ հնչեցրել երկրի հասեցին, իրականությանը չի համապատասխանում։
«Առաջին լրատվական»-ի այն հարցին, թե ո՞րն է եղել իր և Զարոյանի անհամաձայնության պատճառը, Կիրակոսյանը նշեց, որ Վահեն ՀԱԿ-ի համակիր է և ցանկություն է հայտնել միանալ դրան, ինչին ինքը կտրականապես դեմ է եղել։ Արկադին ինքը նախնական համաձայնության հիման վրա սեպտեմբերին կայանալիք կուսակցության հանրահավաքից հետո պետք է միանար ՕԵԿ-ին։
Բանակցությունները տարվել են կոալիցիոն մի շարք կուսակցությունների հետ, սակայն վերջանական ընտրությունը կանգնել է ՕԵԿ-ի վրա։ Իսկ նրանց միանալու պատճառը խորհրդարանի առաջիկա ընտրություններն են, որին կուսակցությունը ցանկանում է մասնակցել, սակայն համապատասխան ռեսուրսներ չունի։ Կուսակցության հիմնական գաղափարախոսությունը լիբերալիզմն է, բաղկացած է 1300 անդամից, որոնցից 12-ը՝ Վահեի հետ միասին, կուսակցությունից հեռացվել են։
Այն հայտարարությունները, թե ոստիկանը միջամտել է միջադեպին, Արկադիի համոզմամբ, տարածվում են կուսակցության ներսից, որպեսզսի ՕԵԿ-ը հրաժարվի իրենց միանալուց, բայց համոզված է, որ ՕԵԿ-ը իրենցից չի հրաժարվի։ Ավելին՝ նա հայտարարեց, որ 2013 թ. պաշտպանելու են Սերժ Սարգսյանի թեկնածությունը։ Այն հարցին՝ եթե Արթուր Բաղդասարյանը որոշի իր թեկնածությունն առաջադրել, ի՞նչ է անելու Արկադին։ «Կոալիցիոն հուշագրի համաձայն՝ սև ու սպիտակով գրված է, որ կոլաիցիան պաշտպանում է Սերժ Սարգսյանին», – պատասխանեց Արկադի Կիրակոսյանը:
