«Առաջին լրատվական»-ի զրուցակիցն է ռուսաստանցի քաղաքական վերլուծաբան Վադիմ Դուբնովը։
-Պարոն Դուբնով, օրերս Ադրբեջանը Հայաստանին ներկայացրեց խաղաղության պայմանագիր կնքելու հինգ կետանոց առաջարկների փաստաթուղթ։ Հայաստանն էլ իր հերթին հղում կատարելով Հելսինկյան Եզրափակիչ ակտին, նշել է, որ խաղաղության պայմանագիր կնքելու հարցով դիմել է ԵԱՀԿ Մինսկի խմբին։ Դուք այս պահին ինչքանո՞վ եք հավանական համարում այդ խմբի շրջանակներում նման համաձայնագրի ստորագրումը։
–Ես կարծում եմ, որ Հայաստանը տակտիկական քայլ է անում, փորձում է պահպանել ներկայիս ստատուս-քվոն, որի շրջանակներում կարողանում է խուսափել Ադրբեջանի տարածքային ամբողջականությունը ճանաչելուց և այդ հարցը ղարաբաղյան խնդրից տարանջատելուց։ Հիմա Ադրբեջանը հարցը հստակ է դնում՝ հանդես գալով պատերազմը հաղթած պետության դիրքերից և որին անհրաժեշտ է ամրապնդել այդ հաղթանակը։ Իսկ Երևանը փորձում է այդ քննարկումներից խուսափել։ Դրա լավագույն տարբերակը Մինսկի խումբն է, որը ֆորմալ առումով գոյություն ունի, բայց փաստացի կարող է միայն Ստեփանակերտի փողոցների տարանջատմամբ զբաղվել։
-Ռուսաստանն այժմ իհարկե զբաղված է Ուկրաինայով, այդուհանդերձ ինչպես կարձագանքի Մինսկի խումբը վերակենդանացնելու առաջարկություններին։
-Ռուսաստանի համար այժմ առաջնային է, որ այնտեղ չլինեն լուրջ էսկալացիաներ։ Ես կարծում եմ, որ Ռուսաստանը հասկանում է Հայաստանի խնդիրը ու դրան վերաբերում է՝ եթե ոչ բարյացակամ, ապա գոնե առանց առարկությունների՝ հաշվի առնելով նաև այն հանգամանքը, որ ինքը ևս ներկայացված է Մինսկի խմբում, ունի ձայնի իրավունք։ Ուստի կարող ենք ասել, որ հարցը որոշակիորեն համաձայնեցված է Մոսկվայի ու Երևանի միջև։ Մյուս կողմից դա անվերջ շարունակվել չի կարող, որովհետև արդեն հիմա նշմարվում է Մոսկվայի ու Բաքվի միջև լարվածություն։ Ես չեմ կարծում, որ Մոսկվան այդ ուղղությամբ լուրջ ռիսկերի կարող է գնալ՝ հաշվի առնելով, որ Թուրքիայի քայլերն էլ այստեղ կանխատեսելի չեն։ Թուրքիան ցանկացած խաղի համար մանևրելու լայն հնարավորություններ է ստանում։
-Վերջերս Թուրքիայի արտգործնախարար Մևլութ Չավուշօղլուն հայտարարեց, որ Հայաստանի ու Ադրբեջանի միջև երկխոսությունը պետք է ընթանա առանց երրորդ երկրների մասնակցության։ Կարծում եք ակնարկը Ռուսաստանի՞ն էր ուղղված։
-Ես չեմ կարծում, թե ակնարկը Ռուսաստանին էր ուղղված։ Ավելի շատ արևմտյան երկրներին։ Ո՛չ, ես չեմ կարծում, թե Մոսկվային էր հասցեագրված։
