«Հայաստան» խմբակցության պատգամավոր Գեղամ Մանուկյանն առաջարկում է 44-օրյա պատերազմի դեպքերը քննող նոր հանձնաժողով ձևավորել, որը կլինի անկախ, ինքնավար մարմին, որի նպատակը կլինի բացահայտել և ամբողջացնել պատերազմի քաղաքական, դիվանագիտական, ռազմական, տնտեսական նախադրյալները, արտաքին քաղաքականության երկկողմ և բազմակողմ հարաբերությունների, բանակցային գործընթացի ձախողման, ինչպես նաև` հայկական կողմի անհաջողությունների պատճառներն ու պայմանները, ինչպես նաև ուսումնասիրել և գնահատել 2020 թվականի նոյեմբերի 9-ի եռակողմ համաձայնագրի, ինչպես նաև դրանից հետո հայկական կողմի իրավազորության ներքո գտնվող տարածքների՝ ադրբեջանական վերահսկողությանն անցնելու փաստական հանգամանքներն ու ձեռնարկված գործողությունների օրինականությունը, իրավաչափությունն ու համաչափությունն է:
Այս խնդրին անդրադառնալով ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանը «Առաջին լրատվական»-ի հետ զրւոյցում նշեց, որ նման նախաձեռնությունն իրենց քննիչ հանձնաժողովի աշխատանքներին խոչընդոտ չի կարող լինել. «Որովհետև մենք ստեղծվել ենք և իրավունքի ուժով գործում ենք: Իրենք էլ կարող էին մասնակցել այդ քննիչ հանձնաժողովի աշխատանքներին, բայց իրենց լիդերները, չգիտես ինչու, իրենց հաշվարկներում այնպիսի առաջարկ են արել, որ իրենք չեն կարող մասնակցել, իրենք էլ դա ընդունել են: Գեղամ Մանուկյանի այս նախաձեռնությունը մեկին մեկ արտացոլված է մեր քննիչ հանձնաժողովի ստեղծման նպատակների մեջ:Այնպիսի տպավորություն է, որ վերցրել արտագրել են ու հիմա ասում են՝ ստեղծում ենք անկախ հանձնաժողով: Սա, ըստ էության, փաստահավաք խումբ ստեղծելու առաջարկ է: Ես նման փորձ ունեմ, գոնե ուսումնասիրեին, որ այն ժամանակ՝ 2008-ին, երբ փաստահավաք խումբ էր ստեղծվում, ինչու այն ժամանակ ամեն ինչ չէին անում, որ փաստահավաք խումբը ոչ թե ստեղծվի միջազգային պարտադրանքի շնորհիվ, այլ Հայաստանի ուժերի պարտադրանքի: Դա է խնդիրը, որ այստեղ քաղաքական ենթատեքստ կա»,-ասաց նա:
