ՀՀ նախագահի օգնական Մարգարիտա Ազարյանը ՀՀ նախագահի լիազորությունները կատարած Ալեն Սիմոնյանի կարգադրությամբ մարտի 11-ից ազատվել է ՀՀ նախագահի օգնականի պաշտոնից։ Ա. Սիմոնյանի համապատասխան կարգադրությունը ստորագրվել է մարտի 10-ին։
Մ. Ազարյանն այս պաշտոնում նշանակվել էր ՀՀ նախկին նախագահ Արմեն Սարգսյանի կարգադրությամբ, 2019-ի ապրիլի 15-ին։
Նշենք, որ Մ. Ազարյանը ԱԺ «Պատիվ ունեմ» խմբակցության ղեկավար, ԱԱԾ նախկին տնօրեն Արթուր Վանեցյանի մայրն է։
Ազարյանը նախագահի աշխատակազմում աշխատել է նաև նախկին նախագահներ Ռոբերտ Քոչարյանի և Սերժ Սարգսյանի պաշտոնավարումների ժամանակ, պաշտոնավարել է նաև ՀՀ վարչապետ Նիկոլ Փաշինյանի աշխատակազմում։
Մասնավորապես՝ 1998-2002 թթ. եղել է ՀՀ նախագահի աշխատակազմի նամակների բաժնի վարիչ, 2011-2018 թթ.՝ ՀՀ նախագահի աշխատակազմի կադրերի վարչության պետ։
2018 թ. հունիսի 27-ին էլ նշանակվել է ՀՀ վարչապետի աշխատակազմի կադրերի և անձնակազմի կառավարման վարչության պետ։
2016 թ. Մ. Ազարյանին շնորհվել է ՀՀ քաղաքացիական ծառայության 1-ին դասի պետական խորհրդականի դասային աստիճան:
2002-2011 թթ. Ազարյանը եղել է ՀՀ քաղաքացիական ծառայության խորհրդի անդամ։
