Ուկրաինան պատրաստ է Ռուսաստանի հետ իրական բանակցությունների, բայց անընդունելի է համարում վերջնագրերը: Այդ մասին «Արմենպրես»-ին հայտնեց Հայաստանում Ուկրաինայի դիվանագիտական ներկայացուցիչը՝ գործերի ժամանակավոր հավատարմատար Դենիս Ավտոնոմովը՝ խոսելով ռուս-ուկրաինական հակամարտության կարգավորման և այդ հարցի շուրջ Բելառուսում սկսված բանակցություններից Կիևի ակնկալիքների մասին:
Ուկրաինացի դիվանագետի խոսքով՝ բանակցությունները միշտ էլ օգտակար են և անհրաժեշտ, սակայն այն պայմանները, որոնք, ի դեմս նախագահ Վլադիմիր Պուտինի և ռուս դիվանագետների, առաջ է քաշում Ռուսաստանը հիմնախնդրի կարգավորման նպատակով, անընդունելի են ուկրաինական կողմի համար և գնահատվում են իբրև վերջնագիր՝ «ուլտիմատում»:
«Բանակցությունները միշտ էլ պետք են, բայց այն, ինչ երեկ Ռուսաստանի նախագահը հայտնեց Ֆրանսիայի նախագահին, և այն, ինչ հնչեցրեց ՄԱԿ-ում Ռուսաստանի դեսպան Նեբենզյան, վերջնագիր է: Խոսքը «դեմիլիտարիզացիայի», «դենացիֆիկացիայի» և Ուկրաինայի չեզոք կարգավիճակի՝ ՆԱՏՕ-ին և Եվրամիության անդամակցելու ծրագրերից հրաժարվելու մասին է: Ես նրանց կողմից պատրաստակամություն չեմ տեսել փոխելու այդ դիրքորոշումը: Իսկ մեր դիրքորոշումն է՝ դադարեցնել կրակը և հետ քաշել զորքերը: Դրանից հետո մեզ վերջնագրեր են ներկայացնում, և մեզ այլ բան չի մնում՝ կռվելուց բացի: Կարող եմ որպես դիվանագետ հավաստիացնել, որ վերջնագիրը և բանակցությունները տարբեր բաներ են», – մեկնաբանեց Ուկրաինայի գործերի ժամանակավոր հավատարմատարը:
«Արմենպրես»-ի հարցին՝ ո՞ր դեպքում Ուկրաինան իրեն հաղթած կհամարի կամ ի՞նչը կհամարի հաղթանակ ստեղծված իրավիճակում, Դենիս Ավտոնոմովը պատասխանեց. «Ուկրաինայի տարածքների ամբողջական ազատագրումը՝ ներառյալ Ղրիմը և Դոնբասը»:
Փետրվարի 28-ին Բելառուսում՝ Գոմելի շրջանում, բելառուսական կողմի միջնորդությամբ սկսվել էին ռուսական և ուկրաինական պատվիրակությունների բանակցությունները: Նույն օրը ՌԴ նախագահ Պուտինը Ֆրանսիայի նախագահ Մակրոնի հետ հեռախոսազրույցում ասել էր, որ Ուկրաինայում իրավիճակը կարող է կարգավորվել միայն Ռուսաստանի ազգային շահերը անվերապահորեն հաշվի առնելու դեպքում: Դրանց թվում են Ուկրաինայի դեմիլիտարիզացիան և դենացիֆիկացիան, Ուկրաինայի չեզոք կարգավիճակի ապահովումը և Ղրիմը որպես Ռուսաստանի տարածքի մաս ճանաչելը:
Փետրվարի 24-ի վաղ առավոտյան Ռուսաստանի Դաշնության նախագահ Վլադիմիր Պուտինը հայտարարել էր Ուկրաինայում հատուկ ռազմական գործողություն սկսելու մասին՝ Դոնբասի հանրապետությունների անվտանգությունը ապահովելու նպատակով: Կրեմլի ղեկավարը շեշտել էր, որ Մոսկվան ձգտելու է Ուկրաինայի «դեմիլիտարիզացմանը» (ապառազմականացմանը) և «դենացիֆիկացմանը»: Դրանից մի քանի օր առաջ՝ փետրվարի 21-ին, Պուտինը ճանաչել էր Դոնեցկի և Լուգանսկի ժողովրդական հանրապետությունների անկախությունը և նրանց ղեկավարների հետ ստորագրել բարեկամության, փոխգործակցության և փոխօգնության մասին պայմանագրեր, որոնք ֆորմալ հիմք տվեցին Ռուսաստանին Ուկրաինայի տարածք զորքեր մտցնելու համար: Ռազմական գործողությունները Ուկրաինայի տարածքում շարունակվում են արդեն 6 օր:
