«Հանքարդյունաբերության ոլորտի հարկման առումով ակնհայտ է, որ այստեղ ոչ թե 1 միլիարդ, այլ մի քանի միլիարդ դրամ կարելի է պետական բյուջե լրացուցիչ բերել»,- «Առաջին լրատվական»-ի հետ զրույցում նման հայտարարություն արեց Պետական եկամուտների կոմիտեի փոխնախագահ Արմեն Ալավերդյանը՝ արձագանքելով այն խնդրին, որ, ըստ մասնագետների, ներկայում հանքարդյունաբերությունից մինչև 1 մլրդ դոլար պակաս է հարկվում:
Ա. Ալավերդյանի խոսքով՝ հանքարդյունաբերության ոլորտը եկամտաբեր ոլորտ է, և այն, որ այդտեղ ռեզերվներ կան, որտեղից կարելի է լրացուցիչ եկամուտներ բերել պետական բյուջե, հայտնի է նաև ՊԵԿ-ին. «Այդ ուղղությամբ մենք էլ ենք աշխատանքներ տանում ֆինանսների նախարարության հետ»:
Ըստ ՊԵԿ փոխնախագհի՝ հարկավոր է կատարելագործել հարկման գործող մեխանիզմները, փոխել օրենսդրությունը, ինչը թույլ կտա լրացուցիչ գումարները բերել պետական բյուջե:
«90-ականների վերջերին հարյուրավոր հանքեր ունեին սեփականատերեր, բայց չէի շահագործվում: Կարծում եմ, շատ մեծ հիմնախնդիր էր հանքարդյունաբերությունը տեղից շարժելը, որ գոնե 1 կամ 1000 տոննա հանքաքար ՀՀ-ից արտահանվեր: Եվ որպես այս բնագավառի հին աշխատող կարող եմ ասել, որ մենք շատ մեծ հիմնախնդիր ունեինք՝ ընդհանրապես ոլորտը աշխատեցնելու հետ կապված. առկա չէին ներդրումներ, սարքավորումներ, հանքի արդյունահանում, փորձարկում և այլն, պետք էր շուկա ձեռք բերել, հնարավորություն ունենալ արտահանել»,- ասաց Ա.Ալավերդյանը՝ հավելելով, որ այդ գործընթացը տեղից շարժվեց, սեփականատերերը կարողացան ներդրումներ կատարել. «Հիմա լավ է, որ մենք այդ հանքերն աշխատացնելու գործընթացից, այնտեղ հարյուրավոր, հազարավոր աշխատողների զբաղվածության խնդրից տեղափոխվում ենք այլ հարթություն՝ ուզում ենք իմանալ ինչքան հարկ կարելի է լրացուցիչ գանձել: Եթե ի սկզբանե մենք շեշտը դնեինք հարկահավաքման գործընթացի վրա, ես կարծում եմ, որ կխոչընդոտեինք հատկապես օտարերկրյա ներդրողներին՝ այդ պահին, լավագույն պայմաններ չէինք ստեղծի հանքերի շահագործան առումով»:
Ա. Ալավերդյանն ընդգծեց, որ այժմ, երբ հանքերը շահագործվում են, տնտեսական ճգնաժամից հետո առանձին հանքատեսակների միջազգային գները բարձրանում են նույնիսկ մի քանի անգամ, այս պայմաններում պետք է վերանայել մոտեցումները, օրենսդրությունը կատարելագործել, որպեսզի պետական բյուջե համարժեք հարկեր գանձվեն:
