«Ցանկացած ընտրություն լարում է պահանջում հասարակությունից: Մենք պատրաստ պիտի լինենք դրան, չվախենանաք՝ ամենակարևորը»,- «Առաջին լրատվական»-ի հետ զրույցում, խոսելով ընտրությունների՝ հասարակության վրա ունեցած ահռելի ճնշման մասին, ասաց արվեստի քննադատ Նազարեթ Կարոյանը:
«Մենք վախենում ենք ընտրություններից, որովհետև դրանք ահռելի լարում են պահանջում: Բնականաբար, մենք ամեն ինչ անում ենք, որ արդյունքը կանխատեսելի լինի»,- նշեց Ն. Կարոյանը՝ ընդգծելով, որ ամեն կերպ ուզում ենք կանխատեսել դրանք ու «տեղ չթողնել պատահականության համար»:
Ըստ նրա՝ ելքն ապագայի նկատմամբ վախերը հաղթահարելն է: «Ընտրության միջոցով է, որ անհատն ու հասարակությունը կարող են իրենք իրենց սուբյեկտիվությունն արտադրել, քանի որ մենք ընտրության միջոցով ենք դառնում սուբյեկտ»,- ասաց նա:
Հարցին՝ ինչո՞ւ չենք ցանկանում դառնալ «սուբյեկտ», Կարոյանը պատասխանեց, որ «անհատականության խնդիր է, անհատի ձևավորման կայացածության խնդիր: Ուրեմն մենք այդ աստիճան անհատականորեն չենք ձևավորվել որպես հասարակություն ու անհատ»:
«Ընտրությունների հետ կապված՝ մեր հասարակությանը միայն ուզում եմ հաջողություն ցանկանալ՝ աշուն կլինի, թե գարուն»,- խոսքը եզրափակեց արվեստագետը:
