«Առաջին լրատվական»-ի տեղեկություններով՝ օգոստոսի 16-ին ինքնասպան եղած՝ Երևանի Կենտրոն և Նորք-Մարաշ վարչական շրջանի դատախուզության 37-ամյա դատախազ Արամ Գրիգորյանը վերջին մեկ տարվա ընթացքում լուրջ խնդիրներ է ունեցել Լոռու մարզի զինդատախազի հետ:
Գրիգորյանի մերձավոր շրջապատից «Առաջին լրատվական»-ին տեղեկացրել են, որ վերջին մեկ տարվա ընթացքում Արամ Գրիգորյանը կասկածելի վարքագիծ է դրսևորել, շատ հաճախ փոխել է բջջային հեռախոսի համարները։ Ամենամոտ ընկերներից մեկը պատմել է, որ Գրիգորյանը կարող էր օրվա մեջ նույնիսկ մի քանի անգամ փոխել բջջային հեռախոսահամարը և տեղյակ չպահել։
Օգոստոսի 16-ի առավոտյան շուտ Արամ Գրիգորյանը պետք է ընտանիքի հետ Վանաձորից վերադառնար Երևան՝ աշխանատանքի։ Անհայտ պատճառներով որոշվել է ավելի ուշ մեկնել Երևան։ Գրիգորյանն ընտանիքի անդամներին ասել է, որ առավոտյան ժամը 11:30-ին պատրաստ լինեն՝ Երևան գնալու համար, այնուհետև ինչ-որ մեկի հետ հեռախոսով շատ բարձր ձայնով վիճաբանել է, ապա դուրս եկել տնից ու գնացել Լոռու մարզի զինվորական դատախազություն:
Զինդատախազությունից դուրս գալով՝ Գրիգորյանը գնացել է մոր շիրիմի մոտ, որտեղ մնացել է 10 րոպե ու ինքնասպան եղել:
Արամ Գրիգորյանի ընկերները բացառում են սպանության կամ ֆինանսական խնդիրների պատճառով ինքնասպանության վարկածը: Նկատի առնելով իրենց ընկերոջ վերջին մեկ տարվա վարքագիծը՝ նրանք կարծում են, որ նա մեկ տարի շարունակ պատրաստվել է այդ քայլին։
Հիշեցնենք, որ 37-ամյա Արամ Գրիգորյանն ինքնասպանություն է գործել հաշվեցուցակային զենքով և թողել գրություն, որում խնդրել է որևէ մեկին չմեղադրել իր արարքի համար:
Նա երեք երեխաների հայր էր և սպասում էր չորրորդի ծնունդին:
