Վերջին ամիսներին ՌԴ-ն ակտիվորեն փոփոխություններ է անում միգրացիոն քաղաքականության մեջ: Նախ՝ Ռուսաստան մեկնող ոչ ռեզիդենտ քաղաքացիների համար 2021-ի դեկտեմբերի 29-ից սահմանվել են նոր կանոններ, մասնավորապես սահմանվել է մատնահետքի, բիոմետրիկ տվյալների պարտադիր հանձնում, իսկ հիմա էլ «Ռուսաստանի Դաշնության քաղաքացիության մասին» օրենքն է փոփոխվում:
ՌԴ ներքին գործերի նախարարությունը տեղեկացնում է, որ ՌԴ-ում գործատուները կարող են խոշոր տուգանքի ենթարկվել առանց ծանուցելու օտարերկրյա քաղաքացիներին աշխատանքի ընդունելու համար։ Տուգանքը կարող է հասնել մինչև 1 միլիոն ռուբլի: Աշխատանքային միգրանտների հետ պայմանագիր կնքելու կամ պայմանագիրը լուծարելու մասին գործատուն այսուհետ պետք է էլեկտրոնային ծանուցում ուղարկի ՌԴ ներքին գործերի նախարարություն:
Ռուսաստանի հայ փաստաբանների ԱՐՄՌՈՍՍ ասոցիացիայի նախագահ Ռուբեն Կիրակոսյանը, «Առաջին լրատվական»-ի հետ զրույցում, անդրադառնալով տեղի ունեցած փոփոխությանը, նկատեց, որ ՌԴ միգրացիոն քաղաքականությունը շատ հաճախ է փոփոխությունների ենթարկվում. քանի որ ՌԴ-ն չունի հստակ միգրացիոն քաղաքականություն, մեղմացնում, հետո նորից խստացումներ են անում օրենսդրության մեջ:
Ինչ վերաբերում է աշխատանքային միգրանտների գրանցման հետ կապված փոփոխությանը, Ռուբեն Կիրակոսյանը նկատեց, որ կա ԵԱՏՄ պայմանագիր, որի 96-րդ հոդվածով ամրագրված է, որ կա ընդհանուր աշխատուժի շուկա և այդ շուկայում գործում են ընդհանուր կանոններ և կարգեր:
«Ամբողջ հարցն այն է, թե այն որքանով է այն հարմարավետ աշխատանքային միգրանտների համար, քանի որ շատերը էլեկտրոնային տարբերակով գրանցվելու խնդիր կունենան, համակարգիչ է պետք և այլն: Այստեղ պետությունը հասկացել է, որ խնդիրը ոչ թե միգրանտներին տուգանելն է, այլ կազմակերպություններին, որտեղ նրանք անցնում են աշխատանքի առանց գրանցման: Շինարարության բնագավառում խոշոր կազմակերպություններում հիմնական աշխատուժ հայեր չկան, հիմնականում շինարարական ոլորտում աշխատում են ասիական պետության ներկայացուցիչները: Այնպես որ, հույս ունեմ, որ այդ խստացումները մեր հայրենակիցներին որևէ կերպ չեն խանգարի»,-ասաց նա:
Կիրակոսյանի խոսքով՝ Ռուսաստանում այսօր շատ լուրջ դեմոգրաֆիկական խնդիր կա, բայց կարիք կա որակյալ աշխատուժի. «Կարծում եմ՝ նրանք, պետք է անդրադառնան այն հարցին, որ կարիք կա որակյալ աշխատուժի, որոնք կրթված են, ունեն մասնագիտություն, հմտություններ: Եվ հիմա խոսք է գնում, թե ինչպես եզրափակել ասիական պետություններից եկով քրեական հակում ունեցող մարդկանց, քանի որ այդ ոլորտում շատ մեծ քանակությամբ այդպիսի մարդիկ կան: Ռուսաստանը պարտավոր է եկողների համար պայմաններ ստեղծել, նրանց հետ պետք է աշխատանք տանեն հոգեբանները, լեզվաբանները, պատմեն, ներկայացնեն այստեղի կարգերը»,-ասաց նա՝ հավելելով, որ իրականում սա երկկողմանի խնդիր է, որ և՜ եկողը պետք է հասկանա, որ պատասխանատու է իր քայլերի համար, և Ռուսաստանը պետք է հասկանա, որ եթե թույլ է տվել, որ գան իր երկրում աշխատանքի, ուրեմն պետք է աշխատանք իրականացնել, որ մարդիկ սոցիալիզացվեն այստեղի բարքերին: Այնուամենայնիվ, Հայաստանից, նրա խոսքով, կա դեպի Ռուսաստան մեծ հոսք, թե որքան են թվերը, փաստաբանը չի կարող ասել:
