Թուրքական Radikal թերթի փոխանցմամբ՝ Սոմալի ուղևորվող Թուրքիայի վարչապետ Էրդողանի ինքնաթիռը Մոգադիշոյի օդանավակայանում վայրէջք կատարելիս հրաշքով է փրկվել կործանումից։ Դեռևս անհայտ պատճառներով վայրէջքի ժամանակ օդանավի աջ թևը բախվել է թռիչքուղուն և վնասվել։
Էրդողանից բացի, ինքնաթիռում է գտնվել նրա պատվիրակությունը, որի կազմում են եղել իշխող «Արդարություն ու զարգացում» կուսակցության (ԱԶԿ) փոխնախագահ Մուսթաֆա Էլիթաշը, Թուրքիայի բորսաների ու պալատների ասոցիացիայի նախագահ Ռիֆաթ Հիսարջըքլըօղլուն, «Դողան» հոլդինգի ղեկավար խորհրդի նախագահ Արզուհան Յալչընդաղը, մի շարք արվեստագետներ, լրագրողներ և պատգամավորներ, այդ թվում նաև թուրք հայտնի ֆուտբոլիստ և նորընտիր պատգամավոր Հաքան Շուքյուրը։
Առավել ազդեցիկ անձանցից օդանավում են գտնվել Էրդողանի կին Էմինե Էրդողանը, փոխվարչապետ Բեքիր Բոզդաղը, Ընտանեկան ու սոցիալական քաղաքականության նախարար Ֆաթմա Շահինը, Առողջապահության նախարար Ռեջեփ Աքդաղը, արտգործնախարար Ահմեդ Դավութօղլուն, Գյուղատնտեսության ու անասնապահության նախարար Մեհդի Էքերը, Կրոնական գործերի նախարար Մեհմեթ Գյորմեզը։
Հիշեցնենք, որ Թուրքիան Սոմալիին արդեն իսկ մատակարարել է 40 տոննա հումանիտար օգնություն, այդ թվում նաև 10 տոննա դեղորայք։ Թուրքական կողմը խոստացել է մինչև Ռամադանի ավարտը Սոմալիին հատկացնել 200 միլիոն դոլարի օգնություն։
