Քաղաքագետ Ալեքսանդր Մարկարովի կարծիքով` Վրաստանի դուրս գալը ԱՊՀ-ից ոչ թե դեմարշ էր կառույցի նկատմամբ, քանզի առանձին երկրների հետ Վրաստանը շարունակում է պահպանել բարիդրացիական հարաբերություններ, այլ հենց Ռուսաստանի նկատմամբ՝ հաշվի առնելով այն հանգամանքը, որ Ռուսաստանը ԱՊՀ-ում հանդես է գալիս որպես առաջին ջութակ:
«Առաջին լրատվական»-ի հետ զրույցում Մարկարովը նշեց, որ 2008 թ. տեղի ունեցած պատերազմական գործողությունները փաստացիորեն ընթանում էին ԱՊՀ անդամ երկրների միջև, և բնական է, որ այդ ամենից հետո Վրաստանին նպատակահարմար չէր շարունակել հանդես գալ մի կառույցի կազմում, որտեղ առաջատար դերը Ռուսաստանին է պատկանում:
Հարցին, թե, դուրս գալով ԱՊՀ-ից, ինչ է կորցրել կամ շահել Վրաստանը, Մարկարովը պատասխանեց. «Հաշվի առնելով Վրաստանի արտաքին քաղաքական առաջնայնությունները, կարելի է ասել, որ Վրաստանը քիչ բան է կորցրել` դուրս գալով ԱՊՀ-ից, իսկ տնտեսական տեսանկյունից այն շարունակում է իր քաղաքականությունն ու համագործակցությունը այն երկրների հետ, որոնք իր համար հետաքրքրություն են ներկայացնում»:
