Վարչապետ Նիկոլ Փաշինյանի դեկտեմբերի 24-ի ֆեյսբուքյան մամուլի ասուլիսում հնչած մի շարք արտահայտություններ դեկտեմբերի 26-ին ստացան ուշագրավ զարգացում Արցախից: Արցախի նախկին պաշտոնյաներ, Արցախի խորհրդարանական ուժեր, Արցախի գործող նախագահը, արտգործնախարարը արեցին հայտարարություններ Արցախի կարգավիճակի վերաբերյալ, քննադատելով Նիկոլ Փաշինյանի մոտեցումներն ու շեշտելով, որ Արցախի ինքնիշխանությունը չունի այլընտրանք: Սրան ի պատասխան գրառում արեց Նիկոլ Փաշինյանը, նշելով, որ իր համար առնվազն տարակուսելի են իր ասուլիսում արտահայտած մտքերի որոշ արձագանք-մեկնաբանություններ, քանի որ ինքը ասուլիսում ընդամենը արձանագրել է այն բանակցային բովանդակությունը, որը եղել է մինչեւ 2018 թվականի ապրիլ, այսինքն մինչեւ իր վարչապետ դառնալը:
Ասուլիսից հետո ստացվում է բավականին արտառոց մի իրավիճակ: Նիկոլ Փաշինյանը կարծես թե ներկայացրել է այն իրողությունները, որ ստացել է այսպես ասած բանակցային ժառանգություն: Փաշինյանը կարծես թե ներկայացրել է այդ բովանդակությունը, այլ ոչ սեփական մոտեցումները: Նրա հայտարարություններին Արցախից հնչած արձագանքների տրամաբանությունը կարծես թե ունի Փաշինյանի «մոտեցումներին» տրվող պատասխանի տրամաբանություն:
Արցախի Ազգային Ժողովը դեկտեմբերի 27-ին պատրաստվում է արտահերթ նիստի, որում ընդունելու են հայտարարություն: Համացանցում մինչ այդ հայտնվել է հայտարարության նախագծի լուսանկար: Փաստացի ստացվում է, որ վարչապետ Փաշինյանն իր ֆեյսբուքյան մամուլի ասուլիսով «խթանում» է Հայաստանի քաղաքական ղեկավարության հանդեպ Արցախի քաղաքական ղեկավարության եւ ուժերի ընդվզում: Նիկոլ Փաշինյանը հաշվարկե՞լ էր այդպիսի հնարավոր արձագանք եւ այդ հաշվարկը ներառում է նաեւ Արցախը «տեղից քաղաքականապես շարժելու» բաղադրիչ, թե՞ նրա համար իսկապես զարմանալի է այդպիսի արձագանքը եւ պարզապես կան ուժեր, որոնք անում են Հայաստանում քաղաքական թեժացման միջոցով իրենց կուսակցական կամ խմբային շահերը սպասարկելու քայլեր եւ դրա համար փորձում են օգտագործել Արցախի որոշ ուժերի վրա ունեցած ազդեցությունը:
Ի դեպ, հետաքրքիր է նաեւ հանգամանքը, որ դեկտեմբերի 14-15-ին Բրյուսելում Ալիեւի հետ երկու հանդիպումներից հետո, Երեւան վերադառնալով, Հայաստանի վարչապետը հյուրընկալել է Արցախի նախագահին եւ քննարկել են հանդիպումներն ու առկա իրավիճակը: Արդյո՞ք այդ հանդիպմանն արտահայտվել են քաղաքական մոտեցումների անհամաձայնություններ: