Մի խումբ դատավորներ գրությամբ դիմել են ԲԴԽ-ին` հրապարակային եղանակով տեղեկություն տրամադրելու վերաբերյալ: Գրության տակ ստորագրած դատավորներն են Ալեքսանդր Ազարյանը, Արշակ Վարդանյանը, Մխիթար Պապոյանը, Դավիթ Բալայանը, Անդրանիկ Մնացականյանը, Դավիթ Հարությունյանը, Արման Հովհաննիսյանը, Վազգեն Ռշտունին և Զարուհի Նախշքարյանը:
Դիմումը ստորագրած դատավորներն իրենց մտահոգությունն են հայտնում դատարանների և դատավորների անկախությունն ու անաչառությունը ակնհայտորեն վտանգող քրեական հետապնդման մարմինների գործողությունների, այլ կերպ՝ անհամաչափ միջամտության և այն կանխելու ուղղությամբ ԲԴԽ կողմից օրենքով և Սահմանադրությամբ նրան վերապահված գործիքակազմը չօգտագործելու, գործողություններին պատշաճ չարձագանքելու փաստի առթիվ, ինչը դատավորների տեսանկյունից հակադրվում է ԲԴԽ սահմանադրական առաքելությանն ու դերին:
Այս առնչությամբ փաստաբան Ալեքսանդր Սիրունյանը «Առաջին լրատվական»-ի հետ զրույցում նշեց, որ այսօր դատարանները շատ ազատ են գործում. «Ես դա ասել եմ 2018-ին, մինչև այսօր ասում եմ. Հայաստանում շատ բան պետք է փոխվեր, որ չի փոխվել, բայց փոխվել է երկու բան՝ դատարանները և ասֆալտը: Հայաստանում դատարանները փոխվել են և սկսել են աշխատել անկաշկանդ, դա փաստ է:
Մեզ մոտ դատարաններն այսօր այնքան ազատ են, որ կլինեն մի խումբ դատավորներ, կարող են լինել բոլոր դատավորները, որ այսօր կարողանում են ձայն հնչեցնել նույնիսկ ուլտիմատումի ձևով ու գիտեն, որ հետո պատժված չեն լինելու: Դատավորն այսօր ազատ արտահայտվելու իրավունք ունի: Այսինքն մարդն այնքան ազատ է, որ կարողանում է նման հարց բարձրացնել: Դե թող 5 տարի առաջ մեկը կարողանար նման հարց բարձրացնել: Նրան պադյեզդում կասեին՝ բարև ձեզ, և դա որպես կանոն, կլիներ գիշերվա ժամը 12-ին կամ 1-ին»,-ասաց նա:
Անդրադառնալով դատական համակարգում վեթինգի անհրաժեշտությանը, Ալեքսանդր Սիրունյանն ասաց. «Վեթինգի պետք է ենթարկվեն բոլորը, վեթինգը պատիժ չէ, այն ստուգման պրոցես է: Այն, ինչով հիմա զբաղվում է ԲԴԽ-ն, այս կամ այն դատավորի նկատմամբ կարգապահական վարույթ կիրառելով, դա վեթինգ չէ: Այն, ինչ անում է ԲԴԽ-ն, դա անելու է նաև վեթինգից հետո: Իսկ վեթինգն այն կոշտ ատամներով սանրն է, որով բոլոր դատավորները պետք է անցնեն, իսկ նրանց գերակշռող մասը շատ նորմալ մարդիկ են: Վատերը դուրս կմնան, լավերն էլ կշարունակեն աշխատել ցմահ»:
