Թուրքական Haber Türk թերթի փոխանցմամբ՝ այսօր Չանքայա նախագահական նստավայրում տեղական ժամանակով ժամը 13.30-ին մեկնարկելու է Ազգային անվտանգության խորհրդի (ԱԱԽ) նիստը, որը նախագահելու է երկրի նախագահ Աբդուլլահ Գյուլը։
Նիստին մասնակցելու են վարչապետ Էրդողանն ու մի շարք նախարարներ, ինչպես նաև Գլխավոր շտաբի պետը, Հատուկ նշանակության զորքերի հրամանատարները։ ԱԱԽ-ի նիստն ամենից առաջ նվիրված է լինելու սիրիական վերջին զարգացումներին, սակայն երեկ Հաքքարի նահանգում քուրդ զինյալների կողմից 11 թուրք զինծառայողների սպանությունից հետո նիստում քննարկվելու է նաև ահաբեկչության դեմ պայքարի հարցը։
ԱԱԽ նիստին մասնակցելու համար Դամասկոսից Անկարա է ժամանելու Սիրիայում Թուրքիայի դեսպան Օմեր Օնհոնը, ով դրանից առաջ հանդիպում է ունեցել Սիրիայի արտգործնախարար Վելիդ Մուալիմի հետ։ ԱԱԽ-ի նիստում քննարկվելու է Սիրիային առնչվող նոր պլանը։ Վերջինս վերածվելու է Սիրիայի հետ Թուրքիայի հարաբերություններում «ճանապարհային քարտեզի», քանի դեռ Սիրիայում իշխում է Ասադի կառավարությունը։
Պլանում ներառվելու է նաև սիրիական ընդդիմության հետ երկխոսությունը, Թուրքիայում սիրիական ընդդիմության հավաքները, Սիրիայում տիրող իրավիճակի հետազոտման վերաբերյալ միջազգային քննարկումների անցկացումը, Ասադի կառավարությանը հեռացնելուն ուղղված միջազգային ջանքերին աջակցելը և այլն։
Հիշեցնենք, որ երեկ Թուրքիայի արտգործնախարար Ահմեդ Դավութօղլուն հերքել է այն տեղեկատվությունը, թե Թուրքիան պատրաստվում է Սիրիայի տարածքում ռազմական միջամտության։
