«Աշխարհում ճգնաժամն արդեն կա և 2013 թվին սպասել պետք չի: Կտարածվի՞ այն, թե՝ չէ. կապիտալը ԱՄՆ ձեռքում է»,- այսօր ասուլիսի ժամանակ հայտարարեց ՀՀ նախկին վարչապետ Հրանտ Բագրատյանը:
Նրա խոսքերով՝ 2008-ի ճգնաժամի լուծումները դեռ տրված չեն, համաշխարհային տնտեսության հավասարակշռություն չկա: Հ. Բագրատյանի բնորոշմամբ՝ 2008-ի ճգնաժամը նախկինում եղած ավանդական ճգնաժամերից չէր, այն աշխարհը մտցրել է պերմանենտ ալիքի մեջ:
Հ. Բագրատյանի տվյալներով՝ ԵՄ 2 երկիր երկորրդ եռամսյակը փակել են ՀՆԱ 0% աճով, Գերմանիայի տնտեսության աճը 0.1% է, այսօր Ֆրանսիայի և Մեծ Բրիտանիայի ցուցանիշը կհայտարարվի, որը լավագույն դեպքում 0%, կամ բացասական կլինի:
«Եթե 2 եռամսյակ փակել են 0%-ով, նշանակում է ռեցեսիա է: Այս ճգմաժամը հենց այնպես չի լուծվելու»,- նշեց Հ.Բագրատյանը՝ հավելելով, որ աշխարհում տեղի են ունենում կապիտալի կուտակումներ, Արևմուտքը գերհագեցած է զարգացմամբ, և ստեղծվել են մեխանիզմներ, որպեսզի կապիտալը չգնա Արևելք: Այդպիսով, կապիտալը մի վայրում կուտակվում է, մի վայրում էլ մարդիկ են կուտակված, ու կապիտալ չկա:
«Ապրուստի հարցն աշխարհում սրվում է: Հավասարակաշռություն սահմանելու համար կամ պետք է միգացիան ազատ թողնեն, կամ կապիտալը տանեն Արևելք»,- ասաց Հ.Բագրատյանը:
Ըստ նրա՝ ներկայում գերլիկվիդային են համաշխարհային բանկային համակարգերը, և եթե ամբողջ տնտեսությունը մտնի ճգնաժամի մեջ, բանկերը կմիանան վերջում: Ճգնաժամի այս փուլում, երբ պահանջարկը գերազանցում է առաջարկին, հումքի գներն էականորեն չեն իջնի: Օրինակ՝ Հայաստանում կարող է իջնել պղնձի գինը, իսկ մոլիբդենը կասոցիացվի ոսկու հետ, և գինը չի իջնի:
