«Առաջին լրատվական»-ի զրուցակիցն է «Հելսինկյան նախաձեռնություն-92»-ի ԼՂՀ կոմիտեի համակարգող, արցախցի իրավապաշտպան Կարեն Օհանջանյանը։
-Պարոն Օհանջանյան, ԵԱՀԿ Մինսկի խմբի համանախագահները հանդիպել են Հայաստանի և Ադրբեջանի արտգործնախարարների հետ, քննարկել նոյեմբերի 9-ի եռակողմ հայտարարությամբ կողմերի ստանձնած պարտավորությունների ընթացքը։ Ինչպե՞ս եք գնահատում այդ փաստը, որ նկատվում է Մինսկի խմբի աշխատանքի ակտիվացում։ Հույս կա՞, որ այն լիարժեքորեն կվերսկսի իր աշխատանքը։
–Ես շատ դրական եմ վերաբերվում ԵԱՀԿ Մինսկի խմբի գործունեության վերսկսմանը։ Ինչպես հիշում եք, ես միակն էի, ով 2020 թվականի նոյեմբերի 9-ի հայտարարությունից անմիջապես հետո նշեց, որ այս հայտարարությունն ընդամենը թղթի կտոր է և որևէ առնչություն չունի միջազգային իրավունքի և ղարաբաղա-ադրբեջանական հակամարտության հետ. այն պետք է լուծվի միջկառավարական ինստիտուտի, օրինակ՝ ԵԱՀԿ-ի և դրա շրջանակներում հատուկ ստեղծված ինստիտուտի շրջանակներում, որը կոչվում է ԵԱՀԿ Մինսկի խումբ։ Իսկ այն, որ Մինսկի խումբը, ավելի կոնկրետ՝ նրա համանախագահությունը ակտիվացրել է իր գործունեությունը, ևս մեկ անգամ հաստատում է, որ ղարաբաղյան հակամարտությունը դեռ հեռու է կարգավորվելուց, և համանախագահության գործառույթները պետք է լինեն միջազգային երաշխիքների ներքո ԼՂՀ քաղաքացիների անվտանգության ապահովումը և վերջնական կարգավիճակի հստակեցումը՝ հակամարտության բոլոր խաղացողների համար։
-ՌԴ ԱԳՆ խոսնակ Մարիա Զախարովան ևս կարևորել է Մինսկի խմբի աշխատանքի վերսկսումը, սակայն շեշտել է, որ խումբը պետք է աշխատանք իրականացնի հումանիտար հարցերի շուրջ։ Արդյոք Մինսկի խումբը կոչված է հումանիտար հարցերի կարգավորման համար։
-Մարիա Զախարովան չի կարող չողջունել միջազգային միջկառավարական ինստիտուտի աշխատանքի սկիզբը, որի գործառույթներն են ղարաբաղյան հակամարտության համապարփակ և վերջնական կարգավորումը։ Հակառակ դեպքում Ռուսաստանը պարզապես դեմ կլիներ միջազգային իրավունքին։ Սակայն Ռուսաստանի դիրքորոշումն արտահայտող նրա հետագա խոսքերը կատարյալ անհեթեթություն են։ Ղարաբաղյան հակամարտությունն առաջին հերթին քաղաքական հակամարտություն է, ոչ թե հումանիտար, և այն պետք է լուծվի ժողովուրդների ինքնորոշման իրավունքի շրջանակներում։ Եվ այդ հարցով հիմնականում զբաղվելու է Մինսկի խումբը, քանի որ ղարաբաղյան հիմնախնդիրն ու դրա լուծումը միջազգային հանրության առաջնահերթության ցանկում են։ Քանի որ Մինսկի խմբի գործունեությունը վերսկսվել է, կարելի է ենթադրել, որ մեր խնդրի լուծումը կրկին համաշխարհային քաղաքականության օրակարգում է։
-Կարո՞ղ ենք հույս ունենալ, որ Մինսկի խումբը ձեռնամուխ կլինի նաև կարգավիճակի վերջնական հստակեցմանը։
-ԵԱՀԿ Մինսկի խմբի համանախագահության գործունեության մեջ անշուշտ կարգավիճակի հարցը լինելու է գլխավորը։ Իսկ հակամարտության արդյունքում առաջացած հումանիտար խնդիրների լուծման համար կան բազմաթիվ միջազգային այլ կառույցներ, որոնք զբաղվում են նման հարցերով։