Աբովյան քաղաքում կայնալիք ընտրություններին ԲՀԿ-ի թեկնածուն լինելու է Գագհիկ Ծառուկյանի թիկնազորի պետ Էդուարդ Բաբայանը:
Այս լուրը «Առաջին լրատվական.-ի հետ զրույցում հաստատեց ԲՀԿ Քաղաքական խորհրդի փոխնախագահ Միքայել Մելքումյանը՝ հավելելով, որ իրենք որոշում են կայացրել մասնակցել Աբովյանի ընտրություններին:
«Բնականաբար, ինքս պարոն Բաբայանի հետ վերջին պառլամենտական ընտրություններին եմ մասնակցել: Բաբայանը բավականին ներդրում ունի որպես ռեյտինգային պատգամավոր բակային տարածքներում, բարեկարգման հարցերում, հարգանքն է վայելում։ Իհարկե ուժեղ մրցապայքար է լինելու, և միանշանակ հաղթելու ենք»,-ասաց նա:
Հիշեցնենք, որ դեռևս 2018 թվականի հուլիսին Էդուարդ Բաբայանին մեղադրանք է առաջադրվել Քրեական օրենսգրքի 112-րդ հոդվածի 2-րդ մասի 6-րդ կետով նախատեսված այն հանցավոր արարքի կատարման համար, որ վերջինս խմբի կազմում հարվածներ է հասցրել և դիտավորությամբ կյանքին վտանգ սպառնացող ծանր վնաս հասցրել Վյաչեսլավ Հարությունովին: վերջինս ստացել է կյանքին վտանգ սպառնացող ծանր վնաս` գլխուղեղի ցնցման, դեմքի և կրծքավանդակի վնասվածքների, կողոսկրի կոտրվածքի և աջակողմյան պնևմոթորաքսի ձևով` ուղեկցված սուր շնչառական անբավարարությամբ:
Նշենք, որ Աբովյանի ՏԻՄ ընտրություններում իշխող «Քաղաքացիական պայմանագիր» կուսակցությունը ներկայացել է 60-հոգանոց ցուցակով, իսկ համայքապետի թեկնածուն Պավել Ցուգունյանն է, որը Կոտայքում ավելի հայտնի է Պաշ մականվամբ: Նա, ըստ մամուլի տեղեկությունների՝ շրջակա միջավայրի նախարար Ռոմանոս Պետրոսյանի կնոջ ազգականն է: վերջինս վերջերս հայտարարել է, ՔՊ-ից ցուցակում ներգրավվել են իրենց ոլորտներում կայացած և ինքնաբավ մարդիկ, ովքեր գալիս են ստանձնելու համայնքի կառավարումը։