Ադրբեջանական Trend լրատվական գործակալության փոխանցմամբ՝ Ադրբեջանում ԵՄ-ի ներկայացուցչության ղեկավար Ռոլանդ Կոբիան մասնակցել է «Օմբուդսմենի ապարատի հմտությունների զարգացում և խտրականության վերաբերյալ իրազեկվածության աջակցում» խորագրով կոնֆերանսին։
Իր ելույթում Կոբիան նշել է. «ԵՄ-ի յուրաքանչյուր անդամ որոշակի պարտականություններ է ստանձնել, այդ թվում նաև մարդու իրավունքների պաշտպանության ոլորտում։ Եվրոպական բոլոր երկրները մշտապես պետք է այդ ոլորտում աշխատեն իրենց վրա, քանի որ ոչ մի երկրում մարդու իրավունքներն ու ժողովրդավարությունը չեն գտնվում կատարյալ մակարդակի վրա։
Այն բանից հետո, ինչ Ադրբեջանը ստանձնեց մարդու իրավունքների պաշտպանության ու ժողովրդավարության վերաբերյալ պարտականությունները, երկրում ստեղծվել է համապատասխան իրավական բազա։ Ամենածանր փուլը սկսվում է այդ օրենքների կիրառման ժամանակ։ Մենք Ադրբեջանին օգնում ենք այդ ոլորտում։ ԵՄ-ը մեծ կարևորություն է տալիս Ադրբեջանի հետ համագործակցությանը»։
Հիշեցնենք, որ հունիսի վերջին Կոբիան հայտարարել էր, որ շուտով կմեկնարկեն ԵՄ-ի ու Ադրբեջանի միջև անցագրային ռեժիմի մեղմացման բանակցությունները.
«Շատ հնարավոր է ԵՄ-ի ու Ադրբեջանի միջև անցագրային ռեժիմի մեղմացումը։ Ձեր մի շարք հարևաններ օգտվում են պարզեցված անցագրային ռեժիմից։ Օրինակ` Ուկրաինան, Մոլդովան և Վրաստանը։
Սակայն անցագրային ռեժիմի մեղմացման համար Ադրբեջանը պետք է իրականացնի մի շարք քայլեր։ Անցագրային ռեժիմի մեղմացումը մեծ նշանակություն ունի Ադրբեջանի ու նրա ժողովրդի համար»։
