Գեղարքունիքի մարզի Վաղաշեն համայնքում տեղի է ունեցել զինվորական պանթեոնի եւ հուշարձանի բացման արարողություն՝ ի հիշատակ 2020 թվականի Արցախյան 44-օրյա պատերազմում զոհված ժամկետային զինծառայողներ Արտյոմ Խաչատուրի Խաչատրյանի եւ Արման Վաղարմենի Մալխասյանի, պահեստազորայիններ եւ կամավորական սկզբունքով ծառայության մեկնածներ Արտյոմ Կարապետի Խաչատրյանի, Արտյոմ Արմանի Պետրոսյանի, Նորայր Լեռնիկի Հայրապետյանի, Սամվել Սահակի Գասպարյանի, Զոհրապ Սամվելի Արշակյանի, Նվեր Արտաշի Բադոյանի, Խաժակ Ֆորմիկի Գրիգորյանի:
Ինչպես տեղեկացրին Գեղարքունիքի մարզպետարանի տեղեկատվության եւ հասարակայնության հետ կապերի բաժնից՝ արարողությանը ներկա են եղել Գեղարքունիքի մարզպետ Կարեն Սարգսյանը, մարզպետի տեղակալ Ռուբիկ Նավոյանը, մարզպետարանի գլխավոր քարտուղար Սևակ Խլղաթյանը, վաղաշենցիներ, հյուրեր, զոհվածների ծնողներ եւ հարազատներ:
Վաղաշեն համայնքի ղեկավար Արթուր Սուվարյանի տեղեկացմամբ՝ Արցախյան վերջին պատերազմում զոհված հերոս տղաների ծնողների նախաձեռնությամբ եւ աջակցությամբ պանթեոնի մուտքի մոտ կառուցվել է հուշարձան, իսկ ողջ տարածքը բարեկարգվել վաղաշենցի բարերարներ Ատոմ Մարտիրոսյանի, Հակոբ Խաչատրյանի, Հենրի Մելքոնյանի, Հուսիկ Հարությունյանի, Մամիկոն Նազարյանի եւ Գրիշա Սուվարյանի միջոցներով։ Աշխատանքների ողջ ընթացքին աջակցել է Վաղաշենի համայնքի ղեկավարը:
Արցախյան 44-օրյա պատերազմում հերոսաբար զոհված վաղաշենցի քաջորդիների հիշատակին մատուցվել է հոգեհանգստի կարգ՝ ձեռամբ Գեղարքունյաց թեմի Լիճքի հոգեւոր հովիվ Տեր Գնել քահանա Մարտիրոսյանի:
Հիշատակի եւ ոգեկոչման խոսքով հանդես է եկել Գեղարքունիքի մարզպետ Կարեն Սարգսյանը` միաժամանակ շնորհակալություն հայտնելով Վաղաշեն համայնքի ղեկավարին եւ բոլոր այն մարդկանց, ովքեր իրենց մասնակցությունն են ունեցել պանթեոնի կառուցման գործում։
«Զոհված զինծառայողների հարգարժան ծնողներ եւ հարազատներ, գլուխ եմ խոնարհում այն քաջորդիների հիշատակի առաջ, ովքեր իրենց կյանքը չխնայեցին հայրենիքի փրկության սուրբ գործի համար։ Դուք պետք է հպարտանաք, քանզի այսօր այն խաղաղությունը, որ մեզ տրվել է, ձեր զավակների շնորհիվ է: Դուք, մենք, բոլորս հանուն մեր հերոսների պարտավոր ենք շենացնել ու հզորացնել մեր երկիրը, կառուցել հզոր բանակ, ստեղծել հզոր տնտեսություն, որտեղ մեր գալիք սերունդները հնարավորություն կունենան ապրելու արժանավայել ու ապահով կյանքով: Փառք ու պատիվ մեր հերոսներն»,- նշել է Գեղարքունիքի մարզպետը:
Վաղաշեն համայնքի ղեկավար Արթուր Սուվարյանը եւս շնորհակալություն է հայտնել զոհված զինծառայողների ծնողներին՝ նման նախաձեռնություն ցուցաբերելու համար:
«Այս նորակառույց պանթեոնը կարող է ծառայել որպես ուսումնադաստիարակչական կենտրոն վաղաշենցի սերունդների համար, քանզի այստեղ այցելելով նրանք կիմանան, թե ինչ սխրանք են գործել այս հերոս տղաները եւ հանուն ինչի է, որ իրենք ապրում են խաղաղ ու բարեկեցիկ երկրում»,- նշել է համայնքի ղեկավարը:
Այնուհետ Գեղարքունիքի մարզպետ Կարեն Սարգսյանի գլխավորությամբ ներկաները ծաղիկներ են խոնարհել հերոսների շիրիմներին եւ խնկարկել նրանց հոգիների հանգստության համար, ինչից հետո գրական-երաժշտական կատարումներով հանդես են եկել վաղաշենցի դպրոցականները: