«Եվրոպայից Հայաստան զբոսաշրջային այցերի չեղարկումը նոր չի սկսել։ Կարելի է ասել, որ Եվրոպայից դեպի Հայաստան կազմակերպված տուրիզմը դեռ չի սկսել։ Եվ ոչ միայն եվրոպայից։ Եվրոպայից, Չինաստանից, Ճապոնիայից։ Այդ երկրներն ավելի զգուշավոր են և կազմակերպված զբոսաշրջությունը դեռ չի սկսել ակտիվանալ»,-«Առաջին լրատվական»-ի հետ զրույցում ասաց «Տուրիզմի հայկական ֆեդերացիայի» նախագահ Մեխակ Ապրեսյանը՝ անդրադառնալով նրան, որ Հայաստանում կորոնավիրուսի դեպքերի ավելացումն ու պատվաստումների շատ նվազ տոկոսը Հայաստանը դեռևս գրավիչ ու ապահով չի դարձնում զբոսաշրջիկների համար։
Ապրեսյանի խոսքով, ցավոք, Հայաստանը դեռևս նպատակային շուկա հանդիսացող երկրներում, եվրոպական երկրներում համարվում է այցելությունների համար խորհուրդ չտրվող երկիր կորոնավիրոսով պայմանավորված և շատ դեպքերում հենց դա պատճառաբանվում է պատվաստումների ցածր տոկոսով։ «Բայց մի բան պետք է հաշվի առնել, որ այդ ուղղությամբ պետք է աշխատել։ Միայն պատվաստումների մակարդակը չպետք է լինի երկիրը կորոնավիրուսի առումով անվտանգ կամ վտանգավոր գնահատելու համար։ Շատ ավելի կարևոր ցուցանիշ է նաև, թե ինչպիսին է վարակվածների թիվը, ինչպիսին է կատարված թեստերի մեջ դրական արդյունքների թիվը։ Մեզ մոտ համեմատած շատ երկրների հետ, ավելի բարվոք վիճակում ենք վարակվածների թվաքանակի առումով։ Եվ մենք թիրախային շուկա հանդիսացող երկրներում դիվանագիտական խողովակներով, առողջապահության նախարարության միջոցով ու հարթակներով, Սփյուռքի ներուժը օգտագործելով, մասնավոր հատվածի ներուժը օգտագործեով պետք է աշխատենք և տեղեկատվությունը հասցնենք այդ երկրներում և կարողանանք փոխել, ուղղել Հայաստանի մասին հրապարակվող տեղեկատվությունը։ Ուշադրություն հրավիրել այն փաստի վրա, որ չպետք է կենտրոնանալ պատվաստումների ցածր թվի վրա, այլ հաշվի առնել վարակվածների թիվը»,-ասաց Ապրեսյանը՝ ավելացնելով, որ այս պահին ավելի շատ Հայաստանի մասին բացասական վերաբերմունք է ձևավորվել, քան իրական վիճակագրությունն է, իրական պատկերն է․«Մեր մասին ավելի վատ պատկերացում կա, քան իրականում ունենք։ Մենք ավելի բարվոք վիճակում ենք, քան աշխարհի շատ այլ երկրներ»,-ընդգծեց Ապրեսյանը։
Միևնույն ժամանակ, ըստ «Տուրիզմի հայկական ֆեդերացիայի» նախագահի, պատվաստումների տոկոսը երկրում զբոսաշրջիկների համար որոշիչ է։ Եթե Հայաստանում պատվաստվածների տոկոսը բարձր լիներ, ապա Հայաստանի գնահատականը դրսում ավելի լավ կլիներ և դա դրականորեն կազդեր տուրիզմի վրա։ «Բայց իմ ասածն այն է, որ մենք չպետք է թույլ տանք, որ Հայաստանը միայն այդ չափանիշով գնահատվի։ Մենք պետք է ամեն ինչ անենք, որ հաշվի առնվի մեր մյուս՝ ավելի կարևոր ցուցանիշները։ Օրինակ վարակվածների թիվը, որը այդքան մեծ չէ Հայաստանում»,- եզրափակեց Մեխակ Ապրեսյանը։
