Առաջին պլաստիկ վիրահատությունները մեզանում կատարվել են 1980-ականներին, սակայն դրանք ի սկզբանե ունեցել են ռեկոնստրուկտիվ բնույթ, հետագա և մասնավորապես վերջին 10-15 տարում պլաստիկ վիրահատությունների քանակը զգալի աճել է:
Այդ մասին այսօր լրագրողների հետ հանդիպմանն ասաց Հայաստանի պլաստիկ վիրաբույժների ասոցացիայի նախագահ, բժշկական գիտությունների թեկնածու, «Էրեբունի» բժշկական կենտրոնի պլաստիկ վիրաբուժության ծառայության ղեկավար, «Դա Վինչի» կլինիկայի տնօրեն Արմեն Հովհաննիսյանը: Իր հերթին բժշկական գիտությունների թեկնածու, դոցնետ,Պլաստիկ վերականգնողական և էսթետիկ վիրաբույժների եվրոպական միության անդամ, Պլաստիկ, վերականգնողական և էսթետիկ վիրաբույժների միջազգային կոնֆեդերացիայի անդամ, «Միքայելյան վիրաբուժության իսնտիտուտի» պլաստիկ և դիմածնոտային բաժնի ղեկավար Հայկ Ենոքյանը նշեց, որ վերջին տարիներին շատացել են նաև էսթետիկ վիրահատության օգնությանը դիմող տղամարդիկ, որոնք վիրահատում են քիթը, կատարում ականջախեցու ուղղում, իսկ կանայք հիմնականում կատարում են կրծքագեղձի վիրահատություն, կոպերի, որովայնի առաջնային պատի ձգում, մաշկի կնճիռների վերացում:
Արմեն Հովհաննիսյանի խոսքով՝ պլաստիկ վիրահատության մեջ կան կանոններ, որոնք խախտել չի կարելի: Էսթետիկ վիրահատությունը վերջին միջոցն է ուղղելու անուղղելին: Նա խորհուրդ տվեց ավելի շուտ զբաղվել առկա խնդիրների կանխարգելմամբ, քան կատարել վիրահատական միջամտություն: «Ցանկացած հաճախորդ պետք է գիտակցի, որ դա լուրջ միջամտություն է և պետք է անցնի կլինիկական քննություն, քանի որ կարող են պատահել համակցված պաթոլոգիաներ»: Գնել Անանյանի խոսքով՝ իրենք կատարում են իրենց դիմած հիվանդների խիստ հոգեբանական ընտրություն, և քանի դեռ դիմողը չի որոշել՝ ինչ է ուզում, վիրահատություն չի կարելի կատարել, քանի որ հիվանդը, միևնույն է, դժգոհ կմնա վիրահատության արդյունքից:
Արմեն Հովհաննիսյանն էլ իր հերթին, խոսելով հետվիրահատական բարդությունների մասին, ընդգծեց, որ էսթետիկ վիրահատությունը կարող է հանգեցնել արյունահոսությունների, թարախակալաման՝ ինչպես մյուս բոլոր վիրահատությունների դեպքում, որից խուսափելու համար հիվանդը պարտավոր է հետևել բժշկի ցուցումներին: Հայաստանում առաջին տեղում քթի վիրահատությունն է, որին հաջորդում են կրծքագեղձերի, որովայնի լիպոսակցիան, դեմքի մաշկի ձգումը:
Տղամարդկանց շրջանում սկսել են ավելի հաճախ դիմել ճաղատության վերացման համար` մազերի տրանսպլանտացիայի: Հայաստանում քթի միջին վիրահատության արժեքը տատանվում է 800-1200 դոլարի սահմաններում: Արմեն Հովհաննիսյանը նշեց, որ վիրահատությունները լինում են այնպիսիք, որ կարող են պահպանել իրենց ազդեցությունն ամբողջ կյանքի ընթացքում, որոշ վիրահոտւթյուններ էլ հարկ կլինի կատարել երկրորդ անգամ, սակայն շատ բան կախված է հիվանդի ապրելակերպից, առողջ կենցաղ վարելու ցանկությունից:
