Ամերիկյան Նյու Յորք նահանգի նահանգապետ Էնդրյու Կուոմոն սեռական ոտնձգությունների է ենթարկել ոչ միայն իր ենթականերին, այլև նահանգային վարչակազմի աշխատակից չհանդիսացող կանանց։ Քննության այսպիսի արդյունքներ է հրապարակել նահանգի գլխավոր դատախազ Լետիցիա Ջեյմսը մամուլի ասուլիսի ժամանակ, փոխանցում է CNN-ը։
Դատախազի խոսքով՝ քննության շրջանակում քննիչները լսել են 179 մարդու ցուցմունք։
«Այդ զրույցների բովանդակությունը, ինչպես նաև մի շարք վկայություններ տալիս են հստակ պատկեր․ նահանգապետ Կուոմոն սեռական ոտնձգությունների է ենթարկել վարչակազմի գործող և նախկին աշխատակցուհիներին՝ խախտելով ինչպես դաշնային, այնպես էլ նահանգային օրենքները»,-ասել է Ջեյմսը՝ հավելելով, որ ոտնձգությունների են ենթարկվել նաև այլ կանայք։
Կուոմոյի նկատմամբ դեռևս մեղադրանքներ չեն առաջադրվել։
ԱՄՆ նախագահ Ջո Բայդենը Սպիտակ տանը լրագրողների հետ հանդիպման ժամանակ ասել է, որ քանի որ քննությունը հաստատել է Էնդրյու Կուոմոյի կողմից ոտնձգությունների փաստը, ապա նա պետք է հրաժարական տա։
