Նախօրեին Էկոնոմիկայի նախարար Վահան Քերոբյանը գրառում էր արել՝ նշելով, որ 2021-ի հունիսին Հայաստանի արտահանումն առաջին անգամ գերազանցել է 300մլն ԱՄՆ դոլարը. «2021 թվականի հունիսին աշխատատեղերի շուկան շարունակել է բուռն աճել՝ սահմանելով հարկման բազա ունեցող աշխատակիցների նոր ռեկորդ՝ 643,256, մայիսի նկատմամբ աճելով 8,305-ով։ Այս ամենի հետ աշխատանքի սուր պահանջարկ կա շինարարության, գյուղատնտեսության, ԻՏ, մշակող արդյունաբերության, նույնիսկ տաքսիի ոլորտներում, հետևաբար, կոչ եմ անում արտերկիր խոպանի գնացած բարեկամներին «բերման ենթարկել»՝ մեր երկիրն ամրացնելու ու զարգացնելու»,-նշել էր նախարարը: Այս թեմայի շուրջ «Առաջին լրատվական»-ը զրուցել է «Russia-armenia.info» լրատվական կայքի խմբագիր, Հայ-ռուսական կազմակերպությունների համակարգող խորհրդի համանախագահ, հասարակական գործիչ Արամ Խաչատրյանի հետ:
«Մենք որպես Ռուսաստանի հայ համայնքի ներկայացուցիչներ, շատ ուշադիր հետևում ենք Հայաստանում ընթացող իրադարձություններին, ուզում ենք, որ այնտեղ բոլոր հարցերը լուծվեն: Իսկ Էկոնոմիկայի նախարարի ասածն ուտոպիա է: Նա կարող է գեղեցիկ, հրաշալի բաներ ասել, բայց շատ դժվար է դրան հավատալը: Եթե իսկապես այդպիսի հնարավորություններ կան, հայերը պարտավոր են վերադառնալ հայրենիք: Պետք է հասկանալ, թե այդ աշխատատեղերը որտեղ են, որքան է աշխատավարձը, և մարդիկ կգան: Հայաստանում շատ մեծ տոկոս են կազմում գործազուրկները: Հայաստանի շատ մարզերում մարդիկ հավաքել են ճամպրուկները, որ հեռանան, քանի որ աշխատանք չունեն: Գուցե իսկապես կան այդպիսի ծրագրեր, աշխատատեղեր, սակայն մարդիկ տեղեկացված չեն դրանց մասին: Ես կողմ եմ, որ Հայաստանում իրականում լինեն այդպիսի ծրագրեր, այդպիսի հնարավորություններ, որ մարդիկ չհեռանան»,-ասաց նա:
Արամ Խաչատրյանի խոսքով, վիճակագրության տվյալներով այս տարի արդեն Հայաստանից հեռացել է 140 հազար մարդ, բացասական բալանսը կես տարվա համար կազմում է մոտ 80 հազար մարդ: «Դրանք այն մարդիկ են, որոնք անվերադարձ լքել են Հայաստանը: Շատերը հեռանում են ընտանիքներով: Նրանց մեծ մասը գնում է արտերկիր աշխատանք գտնելու, որ կարողանա պահել իր ընտանիքը: Պատերազմը դադարելուց հետո Հայաստանում շատ վատ իրավիճակ է ստեղծվել, հետևաբար Էկոնոմիկայի նախարարը պարզապես վարդագույն ակնոցներով է ներկայացնում իրականությունը: Պարզապես չկա որևէ ծրագիր, որպեսզի մարդիկ վերադառնան:
Օրինակ, իմ հարազատները ապրում են Աբովյանում, Սևանում, այնտեղ ընդհանրապես աշխատանք չկա: Նրանք Սևանից ամեն օր հասնում են Երևան, որպեսզի կոպեկներ աշխատեն: Ես չգիտեմ, թե որտեղ են այդ հսկայական հնարավորություններն ու թափուր տեղերը:
Նույն վիճակն է նաև Ռուսաստանում, երբ շատերը տարբեր ռեգիոններից գալիս են Մոսկվա, Պետերբուրգ, Կրասնոդար այլ մեծ քաղաքներ, որպեսզի փող վաստակեն:
Ես չեմ հավատում նախարարի խոսքերին, դրանք պոպուլիստական հայտարարություններ են: Շատերը հիասթափվել են տնտեսական այնքաղաքականությամբ, որը իրականացնում են Հայաստանի իշխանությունները: Աստված տա, սխալվեմ»,-հայտարարեց Ռուսաստանի հայ համայնքի ներկայացուցիչը:
