Ռուսաստանի փոխարտգործնախարար Անդրեյ Ռուդենկոն ԵԱՀԿ Մինսկի խմբի համանախագահների և ԵԱՀԿ գործող նախագահի անձնական ներկայացուցչի հետ քննարկել է Արցախի հարցը: Այս մասին ասվում է Ռուսաստանի ԱԳՆ հաղորդագրության մեջ: Զրույցի ընթացքում քննարկվել են Լեռնային Ղարաբաղի հակամարտության կարգավորման արդիական հարցեր՝ հաշվի առնելով Ռուսաստանի, Հայաստանի և Ադրբեջանի առաջնորդների՝ 2020թ. նոյեմբերի 9-ի և 2021թ. հունվարի 11-ի պայմանավորվածությունները, ասվում է հաղորդագրության մեջ:
Քաղաքագետ Ռուբեն Մեհրաբյանի կարծիքով՝ ակնհայտ է, թե ինչ հարցեր են քննարկվել և ինչ լույսի ներքո․«Մինսկի խմբի համանախագահող երկրներից երկուսը միանշանակորեն շեշտում են, որ բանակցային գործընթացը պետք է շարունակվի, որ կարգավիճակի հարցը լուծված չէ և այդ լուծումը հնարավոր է միայն հենց այդ ձևաչափով։ Պարզ է, որ «սատանան մանրուքների մեջ է» և այդ ամենն ավելի դետալիզացված քննարկելու համար ռուսական կողմի հետ համատեղ քննարկման անհրաժեշտություն է առաջացել, ուստի հանդիպումն էլ Մոսկվայում տեղի է ունեցել։»-«Առաջին լրատվական»-ի հետ զրույցում ասաց նա;
Մեր զրուցակցի դիտարկմամբ՝ Ռուսաստանը միշտ երկակի խաղ է խաղացել ու շարունակելու է դա անել․ «Այսինքն՝ Մինսկի խմբում Ռուսաստանը գործելու է, բայց նաև սեփական շահերից ելնելով դրան զուգահեռ փորձելու է Մինսկի խմբի ձևաչափը շրջանցել։ Կամ եթե Մինսկի խմբի շրջանակներում ինչ-որ բան է պայմանավորվելու, Ռուսաստանը ձգտելու է գողանալ ու տանել սեփական հարթակ։ Մենք դա լավ հիշում ենք՝ Վիեննայի ու այսպես կոչված Սանկտ Պետերբուրգի հանդիպումների դեպքում։ Բայց հարթակ տանելուց էլ Մոսկվան սեփական օրակարգն է առաջ տանելու, ըստ որի Ռուսաստանը շահագրգռված չի լինելու, որ լինի վերջնական կարգավորում, որովհետև վերջնական կարգավորումից հինգ րոպե հետո Ռուսաստանն այստեղ անելիք չի ունենալու՝ համենայնդեպս այն ձևով, որով ունեցել է»։
Մեհրաբյանի խոսքերով՝ Ռուսաստանն այս ամենը շատ լավ հասկանում է և հետևաբար շարունակելու է անել այն, ինչ արել է մինչև այսօր․ «Բայց հանգամանքները պետք է ռուսներին ստիպեն հաշվի նստել իրողությունների հետ։ Պետք է ամեն ինչ անել այդ իրողությունները փոխելու համար։ Սա է ամբողջ հարցը։ Մյուս կողմից էլ՝ կառավարելի անորոշությունն անվերջ պահել չի լինի, կա՛մ այս կողմ, կա՛մ այն կողմ։ Ռուսաստանը մինչ այդ հատել է բոլոր հնարավոր ու անհնարին կարմիր գծերը ու փաստորեն շատ դեպքերում Ռուսաստանի քաղաքականությունը Հայաստանի հետ կապված սկսում է կրել թշնամական բնույթ»:
Դիտարկմանը, թե արևմտյան համանախագահները, Եվրամիության տարբեր ներկայացուցիչներ պնդում են, որ կարգավիճակի հարցը լուծված չէ, ինչը մենք չենք տեսնում Ռուսաստանի պարագայում, քաղաքագետն արձագանքեց․ «Ռուսներն այո՛, ասում են՝ լուծված չէ, բայց եկեք հիմա էլ չլուծենք։ Թողնենք անորոշ ապագայի վրա, իսկ հիմա եկեք զբաղվենք դելիմիտացիայով, դեմարկացիայով և այլ բաներով։Մենք փաստորեն տեսնում ենք, որ ռուսների առաջարկածով նույնիսկ մեր գերիները չեն վերադառանում, ռուսների առաջարկածով որևէ ճանապարհ չի բացվում և մի բան էլ Հայաստանի տարածքների նկատմամբ նկրտումներ ենք տեսնում։Երրորդ՝ մենք տեսնում ենք , որ Հայաստանի սահմանների վրա սահմանային ճգնաժամեր են տեղի ունենում այս կամ այն հատվածում, կամ փոխհրաձգություններ, ինչպիսին որ եղավ անցած օրերի ընթացքում Երասխում։Մենք տեսնում ենք, որ սրա հետ կապված Ռուսաստանը կա՛մ ասելիք չունի կա՛մ քամահրական ձևով ասում է, որ դա սահմանային միջադեպ է կա՛մ պարզապես նեխած օրակարգ է մեջտեղ բերում՝ ասելով, որ այս ամեն ինչն այսպես է լինում, որովհետև դելիմիտաիցա ու դեմարկացիա արված չէ»։
Ռուբեն Մեհրաբյանի խոսքերով՝ մենք գործ ունենք պարզ խաբեության, միաժամանակ նաև անկարողության հետ․ «Բնական է, որ պետք է մոտեցումների փոփոխություն տեղի ունենա։ Նար ձեր հիշատակած հանդիպման ընթացքում այդ հարցերը չեն կարող հնչած չլինել»,-եզրափակեց նա։