Հայաստանի վարչապետ Նիկոլ Փաշինյանը հուլիսի 13-ին հեռախոսազրույց է ունեցել ԱՄՆ պետքարտուղար Էնթոնի Բլինքենի հետ: Հեռախոսազրույցը տեղի է ունեցել ամերիկյան կողմի նախաձեռնությամբ: Զրույցի ընթացքում ամերիկացի պաշտոնյան կարևոր է համարել Հայաստանում ազատ ընտրության անցկացումն ու շնորհավորել Նիկոլ Փաշինյանին հաղթանակի կապակցությամբ, հայտնելով ԱՄՆ աջակցությունը ժողովրդավարական բարեփոխումների հետագա ընթացքի համար:
Փաշինյան-Բլինքեն հեռախոսազրույցում բնականաբար քննարկվել է նաև ռեգիոնալ իրավիճակն ու արցախյան հարցը: Էնթոնի Բլինքենը խոսել է ԵԱՀԿ Մինսկի խմբի շրջանակում գործընթացը վերականգնելու անհրաժեշտության մասին, արձանագրելով դրա համար հստակ օրակարգի սահմանման կարևորությունը: «Պետքարտուղարը հավաստիացրել է, որ ԱՄՆ-ը շարունակելու է ջանքեր գործադրել բոլոր գերիների վերադարձն ապահովելու համար:
Անդրադառնալով Լեռնային Ղարաբաղի հակամարտության թեմային, պետքարտուղարը հույժ կարևորել է ԵԱՀԿ Մինսկի խմբի համանախագահների գործունեության վերականգնումը՝ ընդգծելով խաղաղ գործընթացի հստակ օրակարգի մշակման անհրաժեշտությունը, որը հնարավորություն կտա գտնել հակամարտության կայուն և երկարաժամկետ լուծում», նշվում է հայկական կողմի տարածած հաղորդագրությունում: Այստեղ ուշադրության է արժանի «հստակ օրակարգի մշակման» մասին դիտարկումը: Ի՞նչ նկատի ունի ԱՄՆ պետքարտուղարը «հստակ օրակարգ» ասելով, և արդյո՞ք այստեղ ԱՄՆ որոշակի ակնկալիքներ ունի Հայաստանից, և ի՞նչ ակնկալիքների մասին կարող է լինել խոսքը:
Նահանգները ակնարկում է Հայաստանին, որ պետք է հստակեցնել Արցախի հարցում դիրքորոշումներն ու հայկական օրակա՞րգը, հայկական առաջնահերթություններն ու շահերը, այդպիսով օգնելով Մինսկի խմբի համանախագահության ձևաչափի վերականգնումով շահագրգռություն հայտնող Վաշինգտոնին և Փարիզին, թե՞ ԱՄՆ Հայաստանից ակնկալում է համաձայնություն օրակարգի առնչությամբ Ադրբեջանի որոշակի հարցադրումների: Այստեղ բնականաբար առաջնային պլան է գալիս «Զանգեզուրի միջանցքի» հարցը, որն անընդհատ պնդում է Բաքուն, անկասկած հղում անելով բանակցային պատմությանը և կարգավորման տարբեր էտապներում այդ հարցի քննարկմանը: Ավելին, հայտնի է, որ այդ հարցը քննարկվել է օրինակ ամերիկյան նախաձեռնությամբ Քի Վեսթի տարբերակում, որը գրեթե համաձայնեցված էր Ռոբերտ Քոչարյանի ու Հեյդար Ալիևի միջև, սակայն տապալվեց Ալիևի Բաքու վերադարձից և մտափոխվելուց հետո: Արդյո՞ք Բաքուն համաձայն է Մինսկի խմբի շրջանակում գործընթաց վերսկսելուն, պայմանով, որ «հստակ օրակարգը» ներառի «միջանցքի» հարցը, թե՞ այդպիսի տրամաբանությամբ Բաքվին շահագրգռելու հնարավորություն է դիտարկում ԱՄՆ-ը: Համենայնդեպս, «հստակ օրակարգ մշակելու» մասին ԱՄՆ պետքարտուղարի հայտարարությունը վկայում է, որ Վաշինգտոնը կողմերի հետ քննարկում է կոնկրետ հարցեր:
