Ռեգիոնալ այցի շրջանակում հուլիսի 8-ին Հայաստան կժամանի Եվրոպական հանձնաժողովի հարևանության և ընդլայնման հարցերով հանձնակատար Օլիվեր Վարհեին: Վարհեի այցի նպատակը ռեգիոնի կայունությանն ու կանխատեսելիությանը նպաստելն է, այդ հարցում Եվրամիության շահագրգռությունը և պատրաստակամությունը հավաստելը:
Երևանի մամուլի ակումբի նախագահ Բորիս Նավասարդյանի կարծիքով՝ այցն, ամենայն հավանականությամբ կապված է Հայաստանում անցկացված խորհրդարանական ընտրությունների հետ․«Ամեն դեպքում՝ Հայաստանում այլ քաղաքական իրավիճակ է ձևավորված և բնականաբար Եվրամիությանը հետաքրքրում է, թե ինչպիսի հարաբերություններ ու համագործակցություն կարող է լինել Հայաստանի ու Եվրամիության մեջ։ Մանավանդ որ՝ երկու կողմերը ունեն շրջանակային, երկկողմանի համաձայնագիր և նախորդ տարիներին՝ սկսած 2017 թվականից ստորագրումից հետո շատ բան տեղի չի ունեցել այդ համաձայնագրի իրականացման համար։ Բնականաբար կողմերից մեկը փորձելու է հասկանալ, թե գործողությունների սառեցումն ինչքանով է շարունակվելու կամ փոխվելու և մենք կունենանք ծրագրի իրականացման համար հետևողական զարգացումներ»,-«Առաջին լրատվական»-ի հետ զրույցում ասաց նա։
Նավասարդյանի դիտարկմամբ՝ Եվրամիությունը պահպանում է որոշակի հետաքրքրություն Արևելյան գործընկերության երկրների նկատմամբ՝ մանավանդ որ այստեղ կան որոշակի ճգնաժամային զարգացումներ՝ առանձին գործընկերների հետ․«Խոսքն առաջին հերթին գնում է Բելառուսի մասին, որը հնարավոր է դադարեցնի իր մասնակցությունը Արևելյան գործընկերությունում։ Եվ հաշվի առնելով աշխարհաքաղաքական իրողությունները և Հայաստան-Ռուսաստան հարաբերությունների որոշ չափով նմանությունը Բելառուս-Ռուսաստան հարաբերությունների, Եվրամիության ու այնտեղի պաշտոնյաների համար կարևոր է հասկանալ, թե ինչ կարելի է սպասել նաև այս ուղղությամբ»։
Մեր զրուցակիցը հույս հայտնեց, որ Բելառուսի՝ ԱլԳ կազմից դուրս գալը Հայաստանի վրա ազդեցություն չի ունենա․«Թեև բնականաբար այնտեղի պատճառներն այլ են, նրանք անմիջական պատասխան են Եվրամիության կողմից պատժամիջոցների կիրառմանը, բայց եթե աշխարհաքաղաքական համատեքստն ավելի լայն հաշվի առնենք, նույն Ռուսաստանին ձեռնտու է, որ որքանով հնարավոր է Արևելյան գործընկերությունում ճգնաժամը խորանա ու լինեն նոր զարգացումներ՝ կապված այն երկրների հետ, որոնք Ասոցացման համաձայնագիրը չեն ստորագրել»։
Հաշվի առնելով պատերազմից հետո ստեղծված իրավիճակը Հայաստանում, Բորիս Նավասարդյանի խոսքերով, չի բացառվում, որ Ռուսաստանում հետաքրքրված լինեն, որ Բելառուս-Եվրամիության հարաբերությունների առանձնահատկությունները որոշ չափով անդրադառնան Հայաստան-Եվրամիություն հարաբերությունների վրա»։
