Արցախի խորհրդարանն իր այսօրվա արտահերթ նիստում միաձայն կողմ քվեարկեց «Ռազմական դրության իրավական ռեժիմի մասին» օրենքում լրացումներ և փոփոխություն կատարելու մասին» օրինագծին:
Արցախի նախագահի կողմից ներկայացված այս նախագծով առաջարկվում է, որ ռազմական դրության ժամանակ մարդկանց սեփականության իրավունքը կարող է սահմանափակվել և նրանց գույքն օգտագործվել ռազմական դրությունից բխող նպատակներով:
Այս խնդրի շուրջ «Առաջին լրատվական»-ը զրուցել է Արցախի խորհրդարանի «Միասնական հայրենիք» խմբակցության պատգամավոր, պետաիրավական հարցերի մշտական հանձնաժողովի նախագահ Սևան Աղաջանյանի հետ, ով նշեց, որ վաղուց պետք է օրենքում այդ փոփոխությունը կատարվեր:
«Հենց պատերազմական գործողությունների ավարտից հետո պետք է այդ փոփոխությունը կատարվեր, մենք ուշացրել ենք: Եթե դա ժամանակին անեինք, այսօրվա դրությամբ մեր բազմաթիվ արցախցիներ արդեն կլինեին Արցախում:
Օրենքի նախագծով նախատեսվում է հետևյալ, որ ռազմական դրության իրավական ռեժիմի ընթացքում ռազմական դրությամբ պայմանավորված խնդիրները լուծելու նպատակով կարող է օգտագործվել նաև ֆիզիկական կամ իրավաբանական անձանց գույքը, եթե Արցախի Հանրապետության ձեռքում գտնվող համապատասխան գույքը բավարար չէ: Բոլորիս համար պարզ է, որ Արցախի տիրապետության ներքո գտնվող գույքը բավարար չէ կապված վերջին պատերազմի հետ: Բազմաթիվ բնակիչներ ներկա դրությամբ գտնվում են Հայաստանում և այլ տեղերում»,-ասաց Աղաջանյանը:
Նա հիշեցրեց, որ Արցախն այդ փորձն ունեցել է արցախյան առաջին պատերազմից հետո. «Այն ժամանակ էլ նմանատիպ որոշում է կայացվել, որի համաձայն այն բնակարանները, որտեղ մարդ չի բնակվում, ժամանակավոր տրամադրվել են տեղահանվածներին: Նույնը փորձում ենք անել նաև հիմա»,-ընդգծեց պատգամավորը:
