Գիշերն ամերիկյան ռազմաօդային ուժերը հարվածներ են ուղղել Սիրիայի տարածքի 2 և Իրաքի տարածքի 1 թիրախի դեմ։ Վերջինս եղել է բազա, որն օգտագործվել է ամերիկացի զինվորականների դեմ անօդաչուների կիրառմամբ օպերացիաների համար։ Այս մասին հայտնում է The New York Times-ը՝ հղում անելով ԱՄՆ նախագահ Ջո Բայդենի վարչակազմի աղբյուրներին։
Պարբերականի փոխանցմամբ՝ վերջին ամիսներին Իրաքում գործող իրանամետ զինված խմբավորումները սկսել են ակտիվորեն օգտագործել անօդաչուները։ Հարձակման նպատակն էր զրկել գրոհայիններին նման հնարավորությունից։ Հարվածներն իրականացվել են լազերային կառավարման ռումբերով։
Նշվում է, որ Սիրիայի տարածքի երկու թիրախներն էլ կիրառվել են հիմնականում որպես պահեստներ։ Ինչպես կարծում են Սպիտակ տանը, երեք օբյեկտներում էլ մարդիկ քիչ են եղել։
Հարվածներ հասցնելու որոշումը կայացրել է անձամբ Ջո Բայդենը։ Մինչ այդ հարցը քննարկել են ԱՄՆ պաշտպանության նախարար Լլոյդ Օսթինն ու ԱՄՆ ԶՈՒ շտաբների պետերի կոմիտեի նախագահ, գեներալ Մարկ Միլլին։
