«Առաջին լրատվական»-ի զրուցակիցն է Պահպանողական կուսակցության նախագահ Միքայել Հայրապետյանը։
-Պարոն Հայրապետյան, վարչապետի հետ հանդիպումն ինչպե՞ս եք գնահատում։ Դուք պատրաստակամություն եք հայտնել ցանկացած մարտահրավերի պարագայում սատար լինել և օգտակար լինել։ Ինչպե՞ս եք պատկերացնում այդ սատարումը։ Հնարավո՞ր է՝ որևէ պաշտոն առաջարկվի Ձեզ։
-Սատարումը մարտահրավերներին դիմակայմանը և աղետի կանխմանը և ոչ թե ինչ-որ թիմի, ինչի մասին ավելի քան հստակ է ասված իմ խոսքում: Վստահ եմ, որ Նիկոլ Փաշինյանն ի զորու չէ ինձ որևէ պաշտոն առաջարկել, և դա ես ասել եմ նրան դեռևս 2018 կամ 2019 թվականի սկզբին: Մի՞թե նա կարող է շրջանցել Մոսվայի սև ցուցակը: Այդ մասին խոսք լինել իսկ չի կարող:
-Ձեր դուրս գալը «Ազատ հայրենիք» դաշինքից միանշանակ չի ընդունվել, ընդհուպ ասում են, որ որոշ ակնկալիքներ ունեք։ Ի՞նչ կարող եք ասել այս մասով։
-Կարող եմ ասել, որ ռուսական ԿԳԲ-ն իր տեղական ագենտուրայով չի դադարեցնում իմ դեմ գործելը: Հանգիստ եմ տանում չեկիստների հալածանքները, սովոր եմ 19 տարեկանից:
-Պարոն Հայրապետյան, իշխանությունը խոստումներ է տալիս, ասում է, որ եկել է օրենքի դիկտատուրա հաստատելու, պողպատյա հեղափոխություն իրականացնելու։ Այս առումով սպասելիքներ ունե՞ք։
-Իհարկե չունեմ: Դա ծիծաղելի է:
-Ձեր հայտարարության մեջ նշել էիք, որ ազգային օրակարգ պետք է ձևավորվի Հայաստանում։ Ընդհանրապես Ձեր ներկայացրած դրույթների վերաբերյալ որևէ տեսակետ հնչե՞ց։
-Իմ հնչեցրած մոտեցումների մասը չկա իշխանության տարածած տեսաերիզում, բայց որոնց մասին շատ ուղիղ ես ասել եմ ու ստացել շատ ուղիղ պատասխաններ, որոնց մասին դեռ կխոսեմ՝ ըստ հարկին: