Նախօրենին տեղի ունեցած Ազգային ժողովի արտահերթ ընտրությունների արդյունքներով նոր խորհրդարանում ներկայացված կլինեն երեք քաղաքական ուժեր՝ «Քաղաքացիական պայմանագիրը», «Հայաստան» և «Պատիվ ունեմ» դաշինքները։
Քաղաքագետ Էմիլ Օրդուխանյանը դժվարանում է ասել՝ քաղաքական ճգնաժամը որքանով կհաղթահարվի, քանի որ երկրորդ տեղով անցած քաղաքական ուժը խնդրահարույց է համարում ընտրությունների արդյունքները։
«Չի կարելի նաև բացառել այդ անհամաձայնությամբ պայմանավորված հետընտրական զարգացումները։ Հետևապես, քաղաքական ճգնաժամն այդ պարագայում չի կարող հաղթահարվել։ Բայց քանի դեռ կոնկրետ հայտարարություններ չեն արվել, թե ինչ քայլերի են դիմելու, ապա հիմա կանխատեսում անելն այնքան էլ արժանահավատ լինել չի կարող»,-«Առաջին լրատվական»-ի հետ զրույցում նշեց քաղաքագետը։
Ինչ վերաբերում է խորհրդարան անցած ուժերին, ապա, ըստ քաղաքագետի, պետք է արձանագրել, որ ամեն դեպքում բալանսավորված խորհրդարան գաղափարական առումով դժվար թե ստացվի։
«Հիմնականում խորհրդարան անցած այն ուժերը, որոնք իրար հայհոյում էին, իսկ հայհոյանքներով դժվար թե խորհրդարանում կառուցողական աշխատանք լինի մեծամասնության և փոքրամասնության միջև»,-հավելեց Օրդուխանյանը։
Իսկ թե ինչու քաղաքական նոր ուժերից և դաշինքներից որևէ մեկին չհաջողվեց հաղթահարել շեմը, քաղաքագետը նշեց, որ եթե սա ժողովրդի տրամադրություններն արտահայտող քվեարկություն է, ապա այստեղ այդ իմաստով պատասխանատվությունը քվեարկողների ուսին է, որ այսպիսի կոնֆիգուրացիա դասավորվեց․
«Հեղափոխությունից հետո ասում էին, որ նախկինների վերադարձ չի լինելու, ստացվեց, որ նախկինները այս պարագայում լավ էլ վերադարձան։ Եվ ցավալի է, որ հեղափոխության արդյունքում ձևավորված առողջ, գաղափարապես կառուցողական տրամադրված ուժերը քվե չստացան»,-ասաց նա։
Օրդուխանյանը նշեց, որ եթե իշխանությունը հավատարիմ մնա քարոզարշավի ժամանակ իր կողմից տրված խոստումներին, ապա պետք է իրականացնի պողպատե հեղափոխություն․ «Հիմա վաղ է ասել՝ որքանով հավատարիմ կմնան իրենց խոստումներին, երբ սկսեն աշխատել, այդ ժամանակ բոլորիս պարզ կլինի»,–ասաց քաղաքագետը։
Լուսանկարը՝ Armeniasputnik-ի
