Օրերս 124 մտավորականներ հանդես էին եկել հայտարարությամբ, որտեղ կոչ են անում չհապաղել և իրենց ձայնը տալ Ռոբերտ Քոչարյանին ու «Հայաստան» դաշինքին, քանի որ դա է միակ փրկությունն այս իրավիճակում: «Հայաստան» դաշինքին սատարելու կոչին այսօր միացել են ևս 133 հայրենի մտավորականներ, գիտնականներ, ակադեմիկոսներ, մշակույթի գործիչներ։
Այս անգամ առաջին հորիզոնականում ՀՀ ԳԱԱ փոխնախագահ, ակադեմիկոս Յուրի Սուվարյանն է, կան նաև ԳԱԱ այլ թղթակից անդամներ։
ԳԱԱ նախագահ Ռադիկ Մարտիրոսյանից «Առաջին լրատվական»-ը հետաքրքրվեց, թե արդյոք դիմել են նաև իրեն միանալու։ Ի պատասխան Մարտիրոսյանը նշեց, որ իրեն չեն դիմել, իսկ եթե դիմեին չունի պատասխան՝ կմիանար, թե ոչ. «Եկեք դրա մասին չխոսենք, ամեն մարդ, անկախ նրանից ակադեմիկոս է, գյուղացի, թե հավաքարար, ինքն է որոշում իր գործողությունները, այնպես որ եթե որոշ ակադեմիկոսներ միացել են, դա իրենց որոշումն է։ Իսկ եթե իմ անունը չկա, նշանակում է չպետք է լիներ»,-ասաց ԳԱԱ նախագահը։
Գեղանկարիչ, արվեստի վաստակավոր գործիչ Սամվել Սևադան Քոչարյանին աջակցելու մտավորականների կոչը բացասական է գնահատում. «Շատ-շատ վատ եմ գնահատում, բառեր չեմ գտնում ասելու»,-ասաց նա՝ հավելելով, որ նրանք իրականում հենց այնպես չեն ստորագրում, եթե հայրենիքի փրկության համար էին ստորագրում, ինչու ժամանակին չէին խոսում, նրանց ձայնը որևէ անգամ չենք լսել, հիմա պարզվում է, որ իրենց ձայնն են առաջ տանում, ստորագրություններ անում, թող անեն։ Ավելին՝ ես այնտեղ լուրջ դեմքեր չտեսա, արել են արել են, իրենց հարմար է, արել են, ինչ անենք, ինձ որևէ մեկը չի դիմել, որ ես որևէ մեկին ստորագրեմ կամ սատարեմ»,-ասաց Սամվել Սևադանը։
Իսկ թե ինչու են նրանց խառնում նախընտրական քարոզարշավին, արդյոք սա կարող ենք դիտարկե՞լ մտավորականներին օգտագործելու քայլ, Սևադան նշեց, որ արդեն իսկ լավ օգտագործված են։
«Այնտեղ ինձ մոտիկ մարդիկ կան, բայց ինձ համար որևէ նշանակություն չունի, եթե օգտագործվել են, դա իրենց խնդիրն է»,-հավելեց գեղանկարիչը։
Անդրադառնալով Քոչարյանի կառավարման տարիները որպես արյունոտ տասնամյակ համարելուն, նա նշեց, որ կոչին միացողների համար արյունալի տասնամյակը նրանց համար կարող է լավ տասնամյակ է եղել, այդ նոստալգիայից խեղդվում են, լավ են զգում իրենց, ուզում են վերադառնա, բայց չի վերադառնա։
Դերասանուհի Արսինե Նավասարդյանն էլ, որ միացել է այս կոչին, նշեց, որ չի ցանկանում մեկնաբանել, սա իր անձնական որոշումն է։
