Բայդեն-Պուտին հանդիպման հանդեպ միջազգային ուշադրությունն իսկ խոսում է այն մասին, որ հանդիպումն առնվազն պարունակում է միջազգային հարաբերությունների համատեքստում էական ազդեցության ներուժ: Միայն այն, որ հանդիպման հարցը եղել է ՆԱՏՕ Վեհաժողովի օրակարգում, որ տեղի ունեցավ հունիսի 15-ին՝ հանդիպումից առաջ, խոսում է այն մասին, որ այդ հանդիպմանը ԱՄՆ նախագահը անելու էր առարկայական հարցադրումներ: Հանդիպման գործնական նշանակության մասին վկայում էր և այն, որ դրան մասնակցելու են նաև ԱՄՆ-ում ՌԴ դեսպանն ու ՌԴ-ում ԱՄՆ դեսպանը: Դա նշանակում է, որ նախագահները քննարկելու էին հարցեր, որոնք հետագայում արդեն պետք է ունենային դիվանագետների մակարդակով «իմպլեմենտացիայի» խնդիր: Այդ ամենով հանդերձ, վաղ է իհարկե հանդիպման մասին եզրակացություններ անել նախնական հայտարարությունների հիմքով: Ի վերջո, շատ հաճախ դրանք ավելի շուտ միտված են լինում բուն իրողությունները քողարկելուն, կամ պարզապես թելադրվում են որոշակի դիվանագիտական արարողակարգով:
Այսպես, թե այնպես, Բայդեն-Պուտին հանդիպման գնահատականը թերևս ժամանակի հարց է և այդ համատեքստում հնարավոր կլինի արձանագրել, թե արդյո՞ք ինչ նշանակալի վարքագծային փոփոխություններ են տեղի ունենում խաղացողների գործողություններում, ինչ ռեգիոններին են առնչվում դրանք և ինչ իրադարձություններ են հաջորդում հանդիպմանը: Ընդ որում, այստեղ անհրաժեշտ է անել թերևս կարևոր արձանագրում:
Մոլորություն է հանդիպումը դիտարկել կամ ընկալել՝ Բայդենը Պուտինին «տեղը դրեց», կամ Պուտինը Բայդենին «տեղը դրեց» տրամաբանության շրջանակում: Իհարկե հանդիպումը տեղի է ունենում ֆուտբոլի Եվրոպայի առաջնության եզրափակիչ փուլին զուգահեռ, և թերևս պակաս հետաքրքրություն չէր առաջացրել, քան հետաքրքիր ֆուտբոլային հանդիպումները, բայց այդուհանդերձ դա ֆուտբոլ չէ և իրավիճակն ու հարցերը շատ բազմազան և բազմաշերտ են, այդպիսի՝ «հաղթանակ, պարտություն, ոչ ոքի» չափումն անհամարժեք դիտարկելու համար:
Անկասկած է, որ եղել են թե որոշակի փոխզիջումներ, թե անհամաձայնություններ և գուցե դրանց առավել կոշտացում, և թե որոշակի պայմանավորվածություններ դերերի և բաժանարար գծերի ճշգրտման իմաստով; Այստեղ անշուշտ մեզ համար առանցքայինը առաջիկայում լինելու է թե ռուսական, թե ամերիկյան կողմերի հետ աշխատանքով, եղած հնարավորությունները օգտագործելով առավելագույնս սեղմ և արագ ժամկետում առավելագույնս տեղեկանալ հանդիպման տրամաբանությանն ու բովանդակությանը և պատրաստվել որևէ տհաճ անակնկալի չենթարկվելուն, իսկ հնարավորության դեպքում էլ՝ օգտակար գործոնների վրա աշխատելուն:
