Հայաստանի պաշտպանության նախարար Վաղարշակ Հարությունյանն ու Սերգեյ Շոյգուն հեռախոսազրույցով քննարկել են Հայաստանի սահմանին ստեղծված իրավիճակն ու դրա հանգուծալուծման համար անելիքների շուրջ ձեռք բերած պայմանավորվածությունները, որ եղել են նախորդ շաբաթ Հարությունյանի Մոսկվա կատարած այցի ընթացքում: Ի՞նչ պայմանավորվածություններ են ձեռք բերված և ինչ է ենթադրում դրանց կատարումը: Այդ տեղեկությունը հանգամանալից մանրամասնված չէ: Մյուս կողմից, այդ մանրամասները թերևս փակ են Հայաստանի հանրության համար, բայց ոչ հակառակորդ կամ թշնամի Ադրբեջանի, հաշվի առնելով այն հարաբերությունները, որ Բաքվի հետ ունի Մոսկվան: Կարո՞ղ է Մոսկվան Երևանի հետ որևէ անակնկալ մատուցել Ադրբեջանին, թե՞ Ադբեջանի հետ գործակցված Երևանին է պարտադրվում իրավիճակ ու քայլեր սահմանի ուղղությամբ, որոնք չէին արվի, եթե չլիներ այսպես ասած հիմնավոր պատճառը:
Պաշտպանության նախարարի մոսկովյան այցի և ձեռք բերած պայմանավորվածությունների հանգամանքը հատկապես ուշադրության է արժանի երկու իրողության ֆոնին: Մասնավորապես, այդ այցին զուգահեռ էր, որ Երևանում հայտարարվեց նոր առաջարկի մասին: Նիկոլ Փաշինյանը բարձրաձայնեց սահմանային լարված գոտում բազմակողմ՝ ԵԱՀԿ Մինսկի խմբի համանախագահության ձևաչափում դիտորդական առաքելության և զորքերի հավասարաչափ հետքաշման մեխանիզմի մասին:
Հարությունյան-Շոյգու մոսկովյան քննարկումները և անելիքների վերաբերյալ պայմանավորվածությունները եղել են այդ առռաջարկին համահու՞նչ, թե՞ հակառակը: Կամ, այդ առաջարկն արվել է այդ պայմանավորվածություններից բխելո՞վ, թե՞ դրանց դիմակայելու համար: Հարցերը համենայն դեպս բաց են: Դրան զուգահեռ, պաշտպանության նախարարի մոսկովյան այցի և բանակցության ֆոնին հայտնի դարձավ արտգործնախարար Արա Այվազյանի հրաժարականի դիմումի մասին: Ինչ է կատարվել իրադարձությունների կամ հանգամանքների այդ եռանկյունում՝ Հարությունյանի Մոսկվա այց և Շոյգուի հետ պայմանավորվածություններ, Երևանում Փաշինյանի անակնկալ առաջարկի բարձրաձայնում և արտգործնախարար Այվազյանի հրաժարականի դիմումի մասին հայտարարություն:
